Attivita'
Il-Karnival Spontanju Għaxqi

Ħal Għaxaq qed jipprepara biex jiċċelebra waħda mill-eqdem tradizzjonijiet tar-raħal; il-Karnival spontanju Għaxqi.

Il-Karnival jibda l-Ġimgħa filgħodu għall-ħabta tad-9.30am b’attività bil-parteċipazzjoni tal-istudenti li jattendu l-iskola Primarja ta’ Ħal Għaxaq.

Il-Karnival tal-Ħadd jikkonsisti f’serata bil-parteċipazzjoni ta’ numru ta’ gruppi ta’ żfin u immedjatament wara l-attività tkompli bis-sehem ta’ numru ta’ maskarati lebsin maskli u kostumi spontanji.

Ikun imiss il-Karnival tat-Tnejn u t-Tlieta.  Ħal Għaxaq huwa l-unika lokalità f’Malta li fih jiġi organizzat il-Karnival Spontanju. Dan il-Karnival ilu jsir għal numru twil ta’ snin.  Ma nafux eżatt meta beda iżda nafu li għandu żgur il’ fuq minn 150 sena li probabbilment jagħmlu l-eqdem wieħed fil-gżejjer Maltin.  Il-Karnival tal-Ħadd, it-Tnejn u t-Tlieta jibda mit-8.00pm ‘il quddiem.

Waqt dan il-Karnival issib kull tip ta’ maskarat u karru imma s-sabiħ tiegħu tibqa’ l-arti u l-ispontanjetà.  Minbarra li diversi persuni jilbsu xi ħaġa milli jsibu oħrajn ikunu ilhom ġimgħat jippreparaw biex joħolqu maskli uniċi magħmula mill-kartapesta, mill-ixkora jew minn xi oġġetti oħra.