Kultura
Għar Dalam u Borġ in-Nadur miftuħin b’xejn għall-pubbliku

Heritage Malta se tiftaħ b’xejn Għar Dalam u t-Tempju ta’ Borġ in-Nadur nhar il-Ħadd li ġej, 22 ta’ Lulju.

Is-sejba ta’ Għar Dalam fis-Seklu 19 kellha relevanza kbira għall-istorja preistorika ta’ pajjiżna wara li fl-iskavar ġew skoperti għadam ta’ bnedmin u ta’ annimali flimkien ma’ artefatti. Fil-preżent l-għar għadu d-dar ta’ diversi speċi ta’ annimali, u wħud minnhom huma ta’ interess kbir għall-fatt li speċi endemika tinstab f’dan is-sit biss. Is-sit kollu ta’ Għar Dalam jikkonsisti fl-għar, sala fuq stil Vittorjan, sala oħra ta’ interpretazzjoni u ġnien b’siġar u pjanti indiġeni Maltin.

Is-sit preistoriku ta’ Borġ in-Nadur kien jintuża kemm fi Żmien it-Tempji kif ukoll fi Żmien il-Bronż. Skavat fis-snin 20, is-sit ta informazzjoni li tejbet l-għarfien ta’ aspetti mill-preistorja Maltija li sa dak iż-żmien kienu għadhom problematiċi, per eżempju d-differenzi bejn Żmien it-Tempji u Żmien il-Bronż. It-tempju b’erba’ apsidi li jinsab fis-sit għandu quddiemu wesgħa kbira magħluqa li hija unika għal binjiet bħal dawn.

Matul l-open day se jsiru għadd ta’ żjajjar bi gwida fiż-żewġ siti. F’Borġ in-Nadur se jsiru erba’ żjajjar bi gwida u jibdew fid-9.30am, fl-10.30am, fis-2.30pm u fit-3.30pm filwaqt li tliet żjajjar bi gwida se jsiru f’Għar Dalam u jibdew fid-9.00am, f’12.00pm u fis-2.30pm.

Għar Dalam u Borġ in-Nadur ikunu miftuħin bejn id-9.00am u l-5.00pm, bl-aħħar dħul isir fl-4.30pm. Iktar tagħrif jinkiseb mill-website ta’ Heritage Malta, www.heritagemalta.org, jew mill-paġna uffiċjali tal-aġenzija fuq facebook.

Aħbarijiet Oħra
Kultura

Is-Soċjetà Filarmonika La Stella, Gudja se ttella’ l-kunċert Factus Obidiens Usque Ad Mortem. Il-kunċert se jittella’ fil-Knisja Arċimatriċi u Arċipretali ta’ Santa Marija nhar il-Ħadd, 7 t’April fis-6.30pm. Se jieħdu sehem…

Kultura

Il-Karnival fil-Marina llum sar imfittex ħafna fiż-żona ta’ Marsamxett, fejn bosta huma dawk li jgħixu fiż-żoni ta’ Tas-Sliema, Gżira, Msida, Pieta’ u naturalment Ta’ Xbiex, li jżuru dan il-Karnival. Din…

Kultura

Għalkemm nafu nemmnu li l-antenati antiki tagħna kienu differenti ħafna minna, il-bżonnijiet fundamentali fiżjoloġiċi u psikoloġiċi tagħhom aktarx kienu pjuttost simili. Dan hu mfassal b’mod grazzjuż fl-istatwetta preistorika li turi…

Kultura

Nhar il-Ġimgħa l-1 ta’ Frar 2019, fis-6.00pm fil-Librerija tal-Fakultà tal-Arti fl-Università ta’ Malta, Tal-Qroqq, Dr Steve Borg se jagħmel taħdita dwar ir-riċerka li ppubblika f’żewġ volumi ta’ kotba, Il-Maltin: Għemilhom,…

Aktar