Mużika
Il-leġġenda tal-jazz Chick Corea għall-Festival tal-Jazz fis-sajf li ġej

Festivals Malta bi pjaċir tħabbar li l-leġġenda tal-jazz Chick Corea se jkun l-attrazzjoni ewlenija tal-Festival tal-Jazz.

Il-kompożitur Amerikan Chick Corea se jkollu 77 sena meta jżur Malta f’Lulju li ġej. Corea hu wkoll mużiċist tal-jazz u jazz imħallat u jdoqq il-pjanu u t-tastiera. Fiż-żjara tiegħu se jerġa’ jingħaqad mal-ħbieb antiki tiegħu John Patitucci u Dave Weckl u se jdoqqu bħala ċ-Chick Corea Akoustic Band. Dakinhar wieħed jistenna li jara l-enerġija inkredibbli ta’ Corea fuq il-pjanu waqt li jisma’ l-kitba mużikali brillanti tiegħu kif ukoll il-maestrija ta’ Patitucci fuq il-baxx u ta’ Weckl fuq it-tnabar (drums). Dan se jkun l-ewwel tour tal-grupp akustiku f’20 sena. Corea kien f’Malta 28 sena ilu fl-1990.

Kemm ilu li beda l-karriera tiegħu bħala solist fl-1966, Corea minn dejjem kien fuq quddiem tal-jazz, kemm bħala pjanist rinomat li esperimenta b’affarijiet ġodda flimkien mal-bands akustiċi tal-jazz kif ukoll bħala mużiċist innovattiv u elettriku fuq it-tastiera mal-gruppi Return to Forever, the Elektric Band, u issa Vigil, li hi band elektro-akustika.

Corea hu r-raba’ artist l-iktar nominat fl-istorja tal-Grammys bi 63 nominazzjoni. Hu kiseb tliet premji tal-Latin Grammy, l-iktar artist li qatt rebaħ premji f’dan il-qasam, bħala l-Aqwa Album Strumentali. Saħansitra ddeskrivewh bħala wieħed mill-aqwa vuċijiet tal-pjanu li ħarġu wara John Coltrane. Id-diskografija tiegħu fiha għadd kbir ta’ albums li bdew bil-klassiku Now He Sings, Now He Sobs fl-1968. Il-kompożizzjonijiet tiegħu saru jitqiesu bħala repertorju standard.

Dwar din l-aħbar, id-Direttur Artistiku tal-Festival tal-Jazz Sandro Zerafa, qal: “Kburin ħafna u ninsabu onorati li se jkollna leġġenda tal-jazz ħajja magħna fis-sajf li ġej f’Ta’ Liesse. Il-preżenza tiegħu biss żgur li se tagħmel il-Festival tal-Jazz l-iktar avveniment mistenni.”

Chick Corea flimkien ma’ Dave Weckl u John Patitucci se jdoqqu s-Sibt 21 ta’ Lulju. Din is-sena l-Festival tal-Jazz se jsir mit-Tnejn 16 ta’ Lulju sas-Sibt 21 ta’ Lulju. Iktar tagħrif dwar il-festival u l-biljetti se jingħataw f’qasir żmien.

Aħbarijiet Oħra
Mużika

Il-grupp TEN08, li qabel kien magħruf bħala Rock Opera Group, nhar il-Ġimgħa ser jagħti kunċert rock klassiku fil-jott marina tal-Birgu, taħt il-Forti Sant Anġlu. Il-kunċert jibda fit-tmienja ta’ filgħaxija u…

Mużika

Kollox jinsab lest għall-kunċert Hooked on Classics, imtella’ mis-Soċieta Filarmonika Maria Mater Gratiae ta’ Ħaż-Żabbar. Kunċert li ser jiftaħ iċ-ċelebrazzjonijiet f’għeluq il-135 sena mit-twaqqif ta’ din is-Soċjetà. Dan il-kunċert ta’…

Mużika

Il-grupp SNIPS mistenni jdoqq fir-Razzett l-Aħmar il-Mosta, ilejla 12 ta’ Mejju 2018. Il-grupp Sqalli jispeċjalizza fil-mużika tat-tip Jazz fusion u huwa ffurmat minn Matteo Mancuso li jdoqq il-kitarra, Riccardo Oliva…

Mużika

It-42 edizzjoni ta’ L-Għanja tal-Poplu – Festival tal-Kanzunetta Maltija ser jittella’ fl-1 ta’ Settembru 2018. Dan hu festival ta’ kanzunetti oriġinali bil-Malti akkumpanjat minn mużika live. Dan il-festival joffri l-libertà…

Aktar