Attivitajiet Kulturali
Min hu Ġaħan u min jixbhu?

Ir-riċerkatriċi Marlene Mifsud se tagħmel taħdita fuq “Il-Ħrejjef ta’ Ġaħan u l-Irrakkuntar Tagħhom”.

Din it-taħdita, it-tnax-il waħda mis-sensiela dwar It-Tradizzjoni Orali tad-Dipartiment tal-Malti tal-Università, hija miftuħa għal kulħadd u d-dħul huwa b’xejn. Dan il-proġett għandu l-appoġġ tal-Klabb Kotba Maltin. It-taħdita se ssir nhar it-Tlieta 30 ta’ Jannar, fis-6.00pm fil-Librerija tal-Fakultà tal-Arti fl-Università ta’ Malta, Tal-Qroqq,

Fl-ewwel parti tat-taħdita, Marlene Mifsud Chircop sa tagħti daqqa t’għajn lejn min ġabar il-ħrejjef ta’ Ġaħan, bħal Hans Stumme u Ġużè Cassar Pullicino, u dak li ġa ġie studjat mill-ħrejjef ta’ Ġaħan, l-iżjed minn Ġorġ Mifsud Chircop, u reċentement minn Elena Tanti Burlò. Imbagħad sa tiddiskuti xi elementi oħra li baqgħu ma ntmessewx mill-istudjużi, fosthom l-awtiżmu, in-nuqqas tal-vista, il-figura tal-ġenituri kritiċi żżejjed jew protettivi żżejjed, il-bestjalità, u l-karattri li jixbhu lil Ġaħan fost il-kleru u fi praspar oħra bħal ta’ Kemużell li ġabret Bertha Ilg. Il-kelliema sa tiddiskuti wkoll varjanti tal-ħrafa li rrakkuntat Anġla Mifsud, iċ-Ċalija.

Marlene Mifsud Chircop, għalliema u riċerkatriċi indipendenti, ħadmet mal-folklorista Ġuże Cassar Pullicino u mal-mejjet żewġha, il-folklorista antropoloġiku Ġorġ Mifsud Chircop. Wara l-ewwel teżi tagħha “Il-Folklor fir- Rumanz Storiku/Romantiku Malti” (1972) u t-tieni “A Motif-Index of the Maltese Folktale” għall-M.A., kompliet bir-riċerka fin-narrattiva popolari, fl-irrakkuntar u fl-għana Malti, illum il-ġurnata b’mod speċjali l-element kulturali u soċjali fl-għana tal-fatt.

Flimkien ma’ żewġha, ipproduċiet u ppreżentat 26 dokumentarju kulturali ta’ 45 minuta għat-televixin: Ix-xogħol Waħdu Jurik u Fuq Għajnejk (1996, 2001, Dir. Alvin Scicluna) u għar-radju Maltese Folklore in the Modern World (2000) u A Folk Festival in Malta (2003). Interpretat u ttraduċiet kemm-il darba l-għana u l-irrakkuntar waqt festivals Malta u barra.

Ħadet sehem f’konferenzi Malta u barra, fejn ippreżentat fost l-oħrajn “Mnarja – a Midsummer’s Festival in Contemporary Malta” (Gothenburg 2006), “Maltese Folk Narrative” (Isle of Bute 2011), “Good Friday Processions in Contemporary Malta” (Innsbruck 2014), “The First Ten Years of the Maltese Folk singing Festival” (Malta 2014), The Development of Maltese Ballads (Malta 2014). Barra diversi sessjonijiet tal-għana u tal-irrakkuntar, kemm f’Malta kif ukoll barra, ideat u koorganizzat l-attivita kulturali “Grimani Min Qatlu?” għal Science in the City (Malta 2014).

Fl-2016 Marlene Mifsud Chircop ħarġet il-ktieb Min Qatel il-Patri? (Klabb Kotba Maltin) mar-Rev. Dr Mark Montebello.

Aħbarijiet Oħra
Attivitajiet Kulturali

Din l-attività ġiet posposta minħabba t-temp. Data oħra titħabbar iktar tard. Il-Ministru għal Għawdex Justyne Caruana nediet l-ewwel edizzjoni tal-attività Lejl Imkebbes li ser issr nhar is-Sibt, 3 ta’ Novembru…

Informazzjoni

Nhar il-Ħadd, 28 t’Ottubru, Heritage Malta qed tistieden lill-pubbliku biex igawdi attivitajiet varji li qed jiġu organizzati fis-sit arkeoloġiku ta’ San Pawl Milqi f’Burmarrad. Bosta mill-attivitajiet se jiffukaw fuq il-produzzjoni,…

Attivitajiet Kulturali

Għal sena oħra konsekuttiva, nhar il-Ħadd li ġej 21 ta’ Ottubru 2018 għall-ħabta tas-6.00 ta’ filgħaxija, ser tkun qiegħda tittella’ l-akbar fjakkolata fil-gżira ta’ Għawdex ġewwa r-raħal ta’ Santa Luċija….

Attivitajiet Kulturali

Nhar il-Ħadd, 7 t’Ottubru, Heritage Malta se tkun qed tiftaħ Għar Dalam u l-Mużew tiegħu f’Birżebbuġa għall-pubbliku bla ħlas. Din hija opportunità biex wieħed iżur l-eqdem sit preistoriku li hawn…

Aktar