Informazzjoni
MIXTA production ser itellgħu pantomina b’risq ‘Passi and Beyond’

Fit-tieni ġimgħa ta’ Diċembru 2017 se tittella’ pantomima fejn parti mill-qliegħ tax-xiri tal-biljetti sejjer imur għall-organizzazzjoni ta’ karità bl-isem ‘Passi and Beyond’. L-organizzazzjoni ‘Passi and Beyond’ tgħin pajjiżi bħall-Albanija u l-Filippini fejn il-faqar hija l-ordni tal-jum u t-tmiem tal-lejl.

Il-missjoni tal-organizzazzjoni ‘Passi and Beyond’ hija “Ngħinu n-nies vulnerabbli”, l-istess missjoni li jkollhom diversi kumpaniji teatrali Maltin u Għawdxin li jaħdmu sigħat twal bla ħlas biex jagħtu divertiment lill-pubbliku Malti u Għawdxi, mit-tfal sal-adulti, sal-anzjani, san-nies li jkunu waħidhom, nies bi bżonnijiet speċjali u familjari tagħhom u nies li ma jkunux jifilħu.

Xejn inqas il-ħidma tal-kumpanija teatrali ‘ACTion Productions’ li emigrat minn l-isem ta’ ‘MIXTA Productions’ għall-ewwel produzzjoni tagħha bl-isem “Jien nagħżel Cindirella fl-aqwa żmien”. L-organizzaturi ta’ ‘ACTIon Productions’ għandhom esperjenza ta’ kif jiddevertu l-pubbliku bil-produzzjonijiet ‘Aladdin u l-bella kumpanija fil-Panama’ miktuba mill-awtur frisk u żagħżugħ Sonic-j Aquilina, u ‘It-Tieġ ta’ Karmena Abdilla’ miktuba mill-mibki u qatt minsi Charles Clews.

Il-kitba ta’ Sonic-j Aquilina sejra terġa’ tiġi animata fil-pantomima “Jien nagħżel Cindirella fl-aqwa żmien”. Cindirella hija storja ta’ tfajla fqira skjava taħt dar u familja mimlija fil-flus. Minkejja li Cindirella hija miżmuma fil-faqar, għandha ruħ u qalb tajba ħafna. It-tjubija ta’ Cindirella tkun ir-rikkezza tagħha. It-tjubija ta’ Cindirella ma titkejjilx bid-dehebijiet u bil-fidda li ma jkollhiex imdawwrin m’għonqha, l-istess bħat-tjubija tal-Prinċep li jsir iħobbha meta jiltaqa’ magħha fil-ballu, l-istess bħall-bnedmin li jgħixu fl-Albanija u l-Filippini u pajjiżi oħra foqra li għalihom din il-pantomima qiegħda tkun dedikata u maħduma, l-istess kumpanija teatrali ‘ACTion Productions’ u kumpaniji teatrali oħra li joffru bla ħlas u interessi oħrajn ħlief li jgħinu u jagħtu gost lill-ħaddieħor; ir-rikkezza tal-ħin, it-talent, is-sagrifiċċju u d-dedikazzjoni wara ġurnata xogħol. Il-kejl tar-rikkezzi hija l-imħabba u mhux il-flus. Dan huwa l-kejl ta’ ‘Passi and Beyond’, ‘ACTIon Productions’ u l-istorja tal-persuna ta’ Cindirella.

Il-kitba ta’ Sonic-j Aquilina f’din il-pantomima hija mżejna b’ironija, sarkażmu, ċajt u satira. Is-satira lejn il-faqar u l-imħabba. It-titlu ta’ din il-pantomima hija wkoll ċajta għall-frażijiet li użaw iż-żewġ partiti politiċi ewlenin fl-elezzjoni ġenerali tas-sena 2017.

“Jien nagħżel Cindirella fl-aqwa żmien” hija taħt id-direzzjoni ta’ Sonic-j Aquilina u Clayton Pace li jgħallmu, jieħdu ħsieb u jmexxu l-iskola tad-drama ‘MIXTA DRAMA by Clayton Pace’. Jieħdu sehem atturi mix-xena televiżiva bħal Michael Stivala, Sonic-j Aquilina, Clayton Pace, Martina Mai Seychell, Jesmond Mizzi, Ileana Cutajar u Sandro Vella. Jieħdu sehem uċuh ġodda bħal Joeylne Scerri, Gaetrya Attard, John Paul Vella, Christian Attard u l-istudenti ta’ ‘MIXTA DRAMA by Clayton Pace’ fost oħrajn. Bis-sehem ukoll taż-żeffiena minn żewġ organizzazzjonijiet; ‘Hypnotic Dancers’ ta’ Angelle Vella u ‘Vanity Dancers’ ta’ Maria Mizzi.

“Jien nagħżel Cindirella fl-aqwa żmien” qalb żfin u kant se tittella’ fit-Teatru Dun Mikiel Xerri qrib il-Knisja Parrokkjali tal-lokalità ta’ Ħaż-Żebbuġ; il-Ġimgħa 8 ta’ Diċembru 2017 fis-7 ta’ filgħaxija, is-Sibt 9 ta’ Diċembru 2017 fis-7 ta’ filgħaxija u l-Ħadd 10 ta’ Diċembru fl-4 ta’ wara nofsinhar.

Il-prezz tal-biljetti huma 8 ewro għall-adulti u 4 ewro għall-etajiet inqas minn erbatax -il sena. Ix-xiri tal-biljetti jsir permezz ta’ telefonata fuq numru ċellulari 79337273.

Aħbarijiet Oħra
Informazzjoni

Nhar il-Ħadd, 28 t’Ottubru, Heritage Malta qed tistieden lill-pubbliku biex igawdi attivitajiet varji li qed jiġu organizzati fis-sit arkeoloġiku ta’ San Pawl Milqi f’Burmarrad. Bosta mill-attivitajiet se jiffukaw fuq il-produzzjoni,…

Informazzjoni

The 36th General Assembly of the European Seismological Commission will take place at the Mediterranean Conference Centre, Valletta between the 2nd and 7th September 2018. This prestigious conference is being…

Informazzjoni

L-għaqda volontarja Żejtun Organisation to Empower You (ŻOEY) bil-kollaborazzjoni tal-Kunsill Lokali taż-Żejtun u l-Fondazzjoni Valletta18 se tkun qed torganizza avventura nazzjonali bla ħlas, The Żejtun National Heritage Treasure Hunt nhar il-Ġimgħa, 10 ta’ Awwissu,…

Informazzjoni

L-arblu navali fil-Forti Sant’Anġlu tniżżel minn Heritage Malta bil-kollaborazzjoni tal-Ordni Sovran u Militari ta’ Malta (SMOM). L-operazzjoni biex instab l-aħjar metodu kif kellu jitniżżel dan l-arblu ilha għaddejja x-xhur u…

Aktar