Teatru
Spazju Kreattiv iniedi l-Programm 2018/2019

Il-programm huwa bbażat fuq it-tliet temi ewlenin ta’ Spazju Kreattiv – identità, diversità u eredità.

Il-mistiedna nġabru fi Spazju Kreattiv nhar is-Sibt filgħaxija fl-okkażjoni tat-tnedija tal-programm eċitanti u divers tal-2018/2019 tiegħu. B’aktar minn 200 persuna kreattiva jikkollaboraw fih, il-programm jibni fuq programmi u kollaborazzjonijiet preċedenti, u jinkludi għażla ta’ rappreżentazzjonijiet, arti viżiva, wirjiet ċinematiċi u residenzi għall-artisti.

Iċ-Ċermen tal-Fondazzjoni Kreattività Rupert Cefai tkellem waqt it-tnedija u qal: “Aħna kburin li bnejna fuq dak li nkiseb fi snin preċedenti, filwaqt li żammejna l-post ta’ Spazju Kreattiv bħala l-katalist nazzjonali għall-kreattività.”

Il-programm se jinkludi madwar 21 esibizzjoni, 20 rappreżentazzjoni, u 400 wirjiet fiċ-ċinema, kif ukoll il-Festival ŻiguŻajg għat-tfal u ż-żgħażagħ. Dawk li għandhom it-teatru għal qalbhom, b’mod partikolari, se jgawdu minn żewġ koproduzzjonijiet ta’ Spazju Kreattiv f’dan l-istaġun, fosthom De-Terminated, li hija miktuba u diretta minn Herman Grech, dwar is-suġġett tal-abort f’Malta, u Repubblika Immakulata ta’ Dù Theatre.

Matul it-tnedija, tkellem ukoll id-Direttur Artistiku ta’ Spazju Kreattiv Toni Sant li qal: “Huwa permezz ta’ kollaborazzjonijiet fit-tul, kemm lokalment kif ukoll internazzjonalment, li rnexxielna noħolqu dan il-programm eċitanti. Ninsabu ħerqanin li nkomplu dan ix-xogħol f’din is-sena li ġejja u fis-snin ta’ wara.”

Fil-fatt, l-2019 se tara progress kbir fil-portafoll internazzjonali ta’ Spazju Kreattiv, minħabba li se jkun qed jipparteċipa fil-Biennale ta’ Ostrale fil-Ġermanja is-sajf li ġej. “Wara l-kollaborazzjoni tagħna ma’ Ostrale bħala parti mill-programm 2017/2018, artisti minn Malta se jkollhom l-opportunità li jkollhom xogħolhom inkluż f’dan il-biennale għall-arti kontemporanja fil-Ġermanja,” ikompli Dr Sant. “Bħalissa qed nagħmlu l-arranġamenti meħtieġa biex nippreżentaw xogħol minn madwar 15-il artist u ninsabu ħerqana li naraw ir-riżultati s-sena d-dieħla.”

Sadanittant, fuq is-suġġett tal-internazzjonalizzazzjoni, il-programm Artisti f’Residenza beħsiebu jkompli u se jara lil Spazju Kreattiv jospita seba’ artisti internazzjonali minn postijiet ’il bogħod bħall-Awstralja, l-Istati Uniti u l-Kanada. Se jaħdmu f’Malta u Għawdex f’diversi dixxiplini.

“Kif jixhed dan il-programm, Spazju Kreattiv ikompli jikber u jiżviluppa,” jgħid Dr Sant. “Aħna ninsabu kuntenti li nippreżentaw ukoll aġġornamenti ġodda lill-bini nnifsu, b’ħafna xogħol li sar matul is-sajf.

“Ninsabu verament kburin b’dan il-programm divers, inklussiv u eċitanti, u ninsabu ħerqana li l-udjenzi jesperjenzawh,” żied jgħid.

Aħbarijiet Oħra
Teatru

Bejn is-17 u d-19 ta’ Mejju fit-Teatru ta’ Spazju Kreattiv tal-Belt Valletta, qed jittella’ addattament pop tar-rumanzett ta’ Francis Ebejer “Il-Ħarsa ta’ Rużann”. Il-kitba għall-palk u d-direzzjoni huma ta’ Jamie…

Teatru

Wara s-suċċess li nkiseb sentejn ilu permezz tal-kummiedja ‘It-Tieġ ta’ Karmena Abdilla’, Mixta Drama se ttella t-tieni kummiedja ‘Il-Honeymoon ta’ Karmena Abdilla’. Il-karattru ta’ Karmena huwa wieħed maħbub minn bosta…

Teatru

Għat-tieni sena konsekuttiva se jittella’ d-dramm mużikali AĦNA LI KONNA MIEGĦU: FUQ IL-GOLGOTA. Dan huwa dramm tal-passjoni mtella’ miż-żgħażagħ Franġiskani – GiFra.  Fuq kitba ta’ Patri Joseph Magro, din is-sena…

Teatru

L-Akbar Imħabba huwa d-dramm għal żmien il-Ġimgħa Mqaddsa li The Drama Group Mosta se tippreżenta din is-sena. Dan id-dramm, oriġinali bħal ma jkunu d-drammi ta’ dan il-grupp huwa t-35 wieħed….

Aktar