Mużika
Via Dolorosa – Għad-Dell tal-Qorriegħa

Nhar il-Ħadd, 18 ta’ Marzu 2018, lejlet festa pubblika, il-Fondazzjoni Santa Ċeċilja ta’ Għawdex se ttella’ l-ħames edizzjoni tal-Kunċert tal-Ġimgħa Mqaddsa.

Din is-sena se jittella’ l-Oratorjo bit-tema ‘Via Dolorosa: Għad-dell tal-Qorriegħa’. It-tema tiegħu hi mnebbħa mir-raba’ dulur tal-Madonna, meta ltaqgħet ma’ Kristu fi triqtu lejn il-Kalvarju.

 L-oratorjo għandu lirika ta’ Mario Borg filwaqt li l-kompożizzjoni mużikali saret minn Antoine Mercieca, Direttur Mużikali u Fundatur tal-imsemmija fondazzjoni. L-Oratorjo jirrakkonta l-ġrajja tar-raba’ dulur tal-Madonna filwaqt li l-awtur ma jibqax marbut ma’ dan id-dulur biss, imma saħansitra jsemmi sensiela ta’ duluri u tbatijiet tal-umanità ta’ żmienna. L-udjenza li se tkun preżenti għall-esekuzzjoni ta’ dan l-oratorjo se jkollha l-possibbiltà li mhux biss tidħol fil-qalba tar-raba’ dulur tal-Madonna, imma saħansitra tattribwixxi l-istess dulur mal-ħajja u r-realtà tal-lum.

 Din il-kompożizzjoni mużikali ġiet miktuba għal kor, solisti u orkestra. Fil-fatt se jieħdu sehem il-kor u l-orkestra ‘Santa Ċeċilja’ flimkien mas-solisti Ruth Portelli (il-Madonna), Rosabelle Pavia (Marija ta’ Kleofa), Marthese Borg (Marija ta’ Magdala), Angelo Muscat (Ġesù), George Mercieca (Ġwanni u Pilatu), waqt li l-kor se jkun jagħmel il-parti tal-poplu Lhudi.

 Il-leader tal-orkestra se jkun James Zammit filwaqt li l-kor u l-orkestra se jkunu taħt il-bakketta tas-surmast fundatur Antoine Mercieca.

 L-oratorjo se jsir fis-sala prinċipali tal-Ministeru għal Għawdex, fi Pjazza San Franġisk, ir-Rabat Għawdex, il-Ħadd, 18 ta’ Marzu fis-6:30pm. Kulħadd hu mistieden u d-dħul huwa b’xejn.

Aħbarijiet Oħra
Mużika

Il-kunċerti tħassru minħabba s-sitwazzjoni tal-Covid-19, iżda xi kantanti qed jagħżlu li jibqgħu jferrħu lill-pubbliku bil-mużika mid-dar. Ivan Grech tal-Wintermoods illejla se jkun qed jagħti kunċert minn fuq it-terazzin tad-dar tiegħu…

Mużika

Is-Soċjetà Filarmonika Stella Maris qiegħda torganizza l-kunċert Annwali tal-Milied b’repertorju vast ta’ mużika moderna u klassika, nhar il-Ħamis 12 ta’ Diċembru 2019 fis-7.15pm, fil-Knisja Arċipretali ta’ Stella Maris, fi Triq il-Kbira,…

Mużika

Nhar is-Sibt, 23 ta’ Novembru se tittellgħa l-ewwel edizzjoni tal-Festival Kantamagħna – festival għall-kantanti tfal u żgħażagħ ġewwa t-Teatru Astra. Il-Ministru għal Għawdex, Justyne Caruana, qalet li dan il-festival se…

Mużika

Reġa’ wasal il-Malta International Organ Festival, festival tant mistenni minn dawk kollha dilettanti tal-knejjes u mużika klassika, li din is- sena ser ikun mit-22 ta’ Novembru sas-6 ta’ Dicembru bi ħmistax…

Aktar