Lokali
15-il kumpanija jieħdu sehem f’Jum ir-Responsabbiltà Soċjali Korporattiva 2017

Rekord ta’ 15-il kumpanija ewlenija f’Malta ngħaqdu flimkien biex jieħdu sehem fis-16-il edizzjoni ta’ Jum ir-Responsabbilità Soċjali Korporattiva 2017, magħrufa aħjar bħala s-CSR Day.

Il-kumpaniji parteċipanti u r-rappreżentanti tagħhom inġabru flimkien fir-residenza uffiċjali tal-President ta’ Malta Marie-Louise Colerio Preca, li laqgħet u rringrazzjat lill-volontiera għall-kontribut siewi li qed jagħtu lis-soċjetà.

Mill-Palazz ta’ San Anton, il-gruppi marru lejn il-postijiet rispettivi tagħhom u wettqu għadd ta’ xogħolijiet fosthom żebgħa, tqegħid ta’ madum, ġardinaġġ u tindif. Uħud għażlu li jieħdu tfal minn għadd ta’ djar ta’ karità, dawra ma’ postijiet interessanti.

Mijiet ta’ impjegati minn AIS Group, Computime Group, Express Trailers Ltd, Farsons Group, Forestals Group, FTIAS Ltd, Gasco Energy, GreenPak Co-Op, HSBC Bank Malta, HSBC UKCC Malta, Liquigas Malta Ltd, MEUSAC, Multigas Ltd, Nectar Group, u Tumas Group ipparteċipaw f’wirja sabiħa ta’ impenn għal bidla soċjali pożittiva.

Jum ir-Responsabbilità Soċjali Korporattiva hi attività annwali li evolviet mill-festa pubblika ta’ San Ġużepp Ħaddiem, li taħbat għada l-Ħadd.