Għawdex
191 applikazzjoni għall-iskema ta’ emerġenza marbuta mal-maltempata ta’ Novembru

Kif kien ħabbar il-Ministeru għal Għawdex, fil-każ tal-maltempata tat-12 ta’ Novembru li għadda, ħarġet skema apposta biex dawk il-ħaddiema li ma setgħux jivvjaġġaw jingħataw lura kumpens għall-ispejjeż tal-akkomodazzjoni.

Fi stqarrija, il-Ministeru għal Għawdex qal li għal din l-iskema ġew sottomessi 191 applikazzjoni li jkopru 294 persuna, u bħalissa dawn l-applikazzjonijiet qed jiġu evalwati. Il-pagamenti ser jiġu effetwati fil-ġranet li ġejjin permezz ta’ depositu dirett fil-kont bankarju tal-applikanti.

Il-Ministru Justyne Caruana qalet li dan kien intervent immedjat li ttieħed għall-ewwel darba mill-Ministeru għal Għawdex iżda diġà tħejja pjan u kriterji għal meta jerġgħu jinqalgħu sitwazzjonijiet simili fejn is-servizz tal-Gozo Channel jiġi sospiż għal tul ta’ ħin.