Qorti
Iwieġbu mhux ħatja li qatlu lill-immigrant f’Ħal Far

Żewġt suldati tressqu l-Qorti u wieġbu li mhumiex ħatja tal-qtil, b’mottiv razzista ta’ immigrant f’Ħal Far u bl-atttentat ta’ qtil ta’ tliet immigranti oħra. Lorin Scicluna ta’ 22 sena minn Raħal Ġdid u Francesco Fenech ta’ 21 minn Wied il-Għajn, li minħabba l-każ ġew sospiżi mill-armata, qed jinżammew arrestati fil-Faċilità Korrettiva ta’ Kordin. Il-każ seħħ fil-lejl tas-6 ta’ April li nqatel kiesaħ u biered Lassana Cisse Souleymane ta’ 42 sena mill-Kosta tal-Avorju u ntlaqtu bit-tiri żewġ immigranti oħra fi Triq tal-Ġebel f’Ħal Far. Fenech u Scicluna jinsabu akkużati wkoll li fl-1 ta’ Frar tajru immigrant ieħor bil-karozza fl-istess triq.

Fl-awla tal-Maġistrat Josette Demicoli, Lorin Scicluna u Francesco Fenech semgħu l-akkużi kontrihom ewlenija fosthom tal-qtil ta’ Lassana Cisse Souleymane, immigrant mill-Kosta tal-Avorju.

Minbarra l-qtil ta’ Souleymane, Scicluna u Fenech ġew akkużati bl-attentat ta’ qtil ta’ Ibrahim Bah mill-Guinea u ta’ Mohammed Jallaw mill-Gambja, li seħħ fis-6 ta’ April. Huma jinsabu akkużati wkoll li fl-1 ta’ Frar, ippruvaw joqtlu lil May Malimi miċ-Chad, meta fl-istess triq tajruh bil-karozza u baqgħu sejrin. Huma jinsabu akkużati li wettqu dan l-attentat minħabba mibegħda razzjali.

Ġew akkużati wkoll li dakihar tad-delitt u fix-xhur ta’ qabel qalu jew kitbu kliem ta’ mibegħda razzjali. Scicluna u Fenech jinsabu mixlija wkoll li qatlu qtates u għasafar u li f’okkażjoni oħra sparaw f’post abitat. Ġew mixlija wkoll li bħala uffiċjali pubbliċi huma kellhom jaraw li dawn ir-reati ma jseħħux. Scicluna waħdu jinsab akkużat li kiser il-libertà kundizjonata mogħtija mil-Qorti fuq każ ieħor.

Il-Maġistrat Demicoli spjegat liż-żewġ żgħażagħ li l-akkużi huma serjissimi u jekk jinstabu ħatja, iġorru magħhom piena ta’ għomor il-ħabs

Fil-preżenza tal-genituri u qraba tagħhom, Scicluna u Fenech ċaħdu l-akkużi kontrihom. Scicluna deher viżibilment emozzjonat u anke deher għal xi ħin jibki, waqt li ommu, bilqiegħda warajh, ma waqfitx tibki u anke ġiet ikkunslata minn pulizija mara. Min-naħa l-oħra, Francesco Fenech ftit li xejn wera emozzjonijiet.

L-Ispetturi Keith Arnaud u Trevor Micallef spjegaw li ż-żewġ żgħażagħ ġew arrestati wara żviluppi fl-investigazzjonijiet dwar dan il-qtil. Scicluna ġie arrestat il-Ġimgħa filgħaxija waqt li kien xogħol fil-barracks tal-armata f’Ħal Safi. Is-Sibt filgħodu ġie arrestat Fenech mid-dar tiegħu f’Wied il-Għajn.

Mill-istħarriġ tal-pulizija irriżulta li ż-żewġ akkużati kienu fi Triq tal-Ġebel isuqu karozza Toyota Starlet mingħajr pjanċi tar-reġistrazzjoni u sparaw it-tiri li qatlu persuna u ferew tnejn oħra.

Għall-akkużati qed jidhru l-avukati Julian Farrugia, Kris Busietta u Giannella Demarco. Is-seduta damet madwar 20 minuta, bl-avukati ma għamlux talba għal-ħelsien mill-arrest u iż-żewġ akkużati ttieħdu bi skorta tal-pulizija lejn il-Faċilità Korrettiva ta’ Kordin.

Ara wkoll:

AĠĠORNAT (3): Tnejn arrestati b’rabta mal-qtil ta’ immigrant f’Ħal Far

Aħbarijiet Oħra
Kronaka

L-Oppożizzjoni qalet fi stqarrija li se titlob lill-Kumitat Parlamentari għall-fondi pubbliċi biex jinvestiga b’urġenza l-għoti tal-hekk imsejħa “golden handshake” lill-uffiċjali biex jirriżenjaw mill-impjieg. Dan wara, fost oħrajn, il-protest ġudizzjarju li…

Turiżmu

L-ogħla numru ta’ passiġġieri li daħlu Malta f’sena abbord cruise-liner mistenni jintlaħaq din is-sena. Bi kważi disa’ mitt elf passiġġier, il-Kap Eżekuttiv tal-Valletta Cruise Port, Stephen Xuereb, qal li l-2019…

Immigrazzjoni

Ir-relazzjonijiet bilaterali bejn Malta u l-Italja ġew diskussi fl-ogħla livell f’taħditiet f’Ruma bejn il-President George Vella u l-President Sergio Mattarella propju fl-istess ħin li fuq il-baħar kienet għaddejja kwistjoni oħra…

Kronaka

Raġel weġġa’ gravi f’inċident f’Marsaxlokk. Il-każ seħħ għall-ħabta tal-5.00pm fi Triq Delimara. Il-Pulizija tad-Distrett marret fuq il-post fejn mill-ewwel stħarriġ irriżulta li raġel ta’ 36 sena li jgħix il-Kalkara kien qed…

Aktar