Lokali
250 persuna jirreġistraw bħala donaturi tal-organi

Kampanja ta’ ftit jiem organizzata mill-Malta Music Awards b’kollaborazzjoni tal-istazzjon tal-PBS, Magic Malta, waslet biex 250 persuna daħlu fir-reġistru tad-donaturi tal-organi biex wara mewthom l-organi tagħhom jkunu jistgħu jingħataw għal trapjanti. F’ċerimonja li mmarkat din il-kampanja, kienu preżenti wħud mill-persuni li fl-aħħar snin gawdew mid-donazzjoni tal-organi.

TVM tkellem ma’ Rita Arnaud u Daniela Dalli li għaddew minn trapjanti tal-kliewi u m’għandhomx kliem biżżejjed biex jirringrazzjaw lid-donaturi li tawhom ħajja ġdida.

Ta’ tmien snin, Daniela Dalli kellha d-dijabete. Wara snin, il-marda qerdulha l-kliewi u spiċċat tagħmel id-dijalisi għal ħames snin.

“Tbatija enormi – tieqaf mis-socializing, ma tkunx tista’ tixrob għax tkun żidt fl-ilma u ma tbattlux, allura inti tiġi hawn l-isptar, ineħħulek il-veleni ta’ ġismek, ibattlulek kollox – veru kiefra – wara erba’ sigħat tbiddel id-demm”.

Daniela qalet li fil-Milied ta’ erba’ snin ilu rċeviet telefonata li nstabitilha kilwa kompatibbli magħha.

“Terġa’ tiġi fuq saqajk litterlament, ma tkunx muġugħa, ma tiġix hawnhekk tliet darbiet fil-ġimgħa, erba’ sigħat kull darba. Ma tkunx tista’ tkompli mal-ħajja, iebsa mmens, speċjalment tkun żgħir tkun għadek taħdem.”

Xahrejn wara t-trapjant tal-kilwa, Rita Arnaud m’għandhiex kliem biżżejjed biex tirringrazzja lid-donaturi tal-organi li bis-saħħa tagħhom tħossha twieldet mill-ġdid.

“Anke timxi, qabel kont ngħajja nimxi naqra, qabel ma kontx nista’ nixrob, issa rrid nixrob ħafna iktar – ikel ma kontx nista’ niekol ċerti affarjiet – issa nista’ – mhux li tista’ tiekol kollox – xorta trid toqgħod attenta imma ħafna aħjar milli kont.”

L-istazzjon tal-PBS, Magic Malta, il-kollaboratur ewlieni fl-organizzazzjoni tal-Malta Music Awards, fl-aħħar jiem nieda kampanja biex aktar nies jinkitbu bħala donaturi tal-organi. Carlo Borg Bonaci mill-Magic Malta qal li fi ftit jiem gew registrati 250 donatur – għaxar donatur għal kull sena li ilhom jiġu organizzati l-Malta Music Awards.

“Aħna qed nimmotivaw lill-artisti biex ikunu huma bħala eżempju għal ħafna Maltin u Għawdxin u ltqajna ma’ ħafna okkażjonijiet fejn għamilthuhielna sempliċi, dejjem nisimgħu bil-kampanja, iżda dak il-pass ma nagħmluhx u aħna nħeġġu lil Maltin u l-Għawdxin biex jagħmlu bħall-oħrajn.”

Carlo Borg Bonaci qal li Magic Malta ser ikompli bil-kampanja tul is-sena kollha. Il-lista tad-donaturi l-ġodda ġiet ippreżentata lid-deputat Prim Ministru u Ministru tas-Saħħa Chris Fearne. Il-Ministru Fearne qal li inizjattivi bħal dawn iħeġġu aktar entitajiet biex jorganizzaw attivitajiet simili li jqajmu kuxjenza dwar il-ħtieġa ta’ aktar donaturi. Innota li fi tliet snin mindu tnieda r-reġistru tad-donaturi tal-organi, kważi 25,000 persuna rreġistraw x-xewqa tagħhom li jagħtu l-organi għat-trapjanti wara mewthom.

Aħbarijiet Oħra
Kronaka

Raġel ta’ 34 sena, li joqgħod il-Fgura, weġġa’ gravi waqt li kien qed isuq ir-rota. Mill-ewwel investigazzjonijiet tal-pulizija jirriżulta li ċ-ċiklist kellu mpatt ma’ bollard u ġarrab xi ġrieħi. Huwa…

Kronaka

Żagħżugħ ta’ 19-il sena minn Ħal Tarxien ġie arrestat il-lejl li għadda dwar serqa minn lukanda f’San Pawl il-Baħar. Il-Pulizija qalet li għall-ħabta tal-11:30 p.m. irċeviet rapport minn ħaddiema ta’…

Politika

B’reazzjoni għall-istqarrija tad-deputati Nazzjonalisti li rrefera għalihom bħala li sal-lum mhux magħrufa, il-Kap tal-Oppożizzjoni u tal-Partit Nazzjonalista Adrian Delia qal li s-sottomissjonijiet legali diġà saru minnu stess mal-President ta’ Malta…

Politika

Stennija għal direzzjoni mill-President ta’ Malta George Vella dwar il-kariga tal-Kap tal-Oppożizzjoni skont kif inhu ggwidat mill-kostituzzjoni. Fl-aħħar jumejn, il-President Vella iltaqa’ mad-deputati eletti f’isem il-Partit Nazzjonalista biex jara kif ser…

Aktar