Qorti
30 jum ħabs għal 2 immigranti minuri li ppruvaw jaħarbu minn Malta b’passaporti foloz

Żewġ żgħażagħ Tuneżini ta’ 15 u 17-il sena ammettew li ppruvaw jaħarbu lejn l-Italja b’passporti foloz.

L-ispettur Hubert Gerada spjega lill-Maġistrat Charmaine Galea li dalgħodu ż-żgħażagħ pruvaw jaqbdu l-katamaran għal Sqallija b’passaporti Taljani foloz.

Wieħed minnhom qal lill-pulizija li ried imur l-Italja biex imur it-Tuneżija.

Iż-żgħażagħ huma immigranti li waslu Malta f’Awwissu li għadda u li kienu qed jgħixu f’Dar il-Liedna, il-Fgura.

L-Ispettur qal li huma qalu lill-pulizija jaħdmu ma’ Sudaniż li ilhom ma jaraw u taw informazzjoni fqira lill-pulizija.

Skont huma ħallsu bejn €500 u €600 lil dan is-Sudaniż għall-passaport.

Assistiti mill-avukat tal-għajnuna legali – Dr Simon Micallef Stafrace, iż-żgħażagħ ammettew l-akkużi kontrihom.

Fid-dawl li huma taħt l-età huma weħlu 30 ġurnata ħabs kull wieħed.