Barranin
324 persuna jitilfu ħajjithom kawża tal-għargħar fl-Indja

Fl-Istat ta’ Kerala fl-Indja l-għargħar ħalla mill-anqas 324 persuna mejta bl-awtoritajiet jgħidu li dan kien l-agħar għargħar fl-aħħar mitt sena.

Il-monsoon fl-Indja jibda minn Ġunju bl-iskwadri ta’ salvataġġ qed jissieltu mal-ilmijiet biex isalvaw kemm jista’ jkun nies. S’issa qed jingħad li mal-kwart ta’ miljun persuna jinsabu mingħajr saqaf fuq rashom.

Il-Prim Ministru Narendra Modi mistenni li jżur l-istat biex jara b’għajnejh id-diżastru li kkawżaw l-ilmijiet. Il-Gvern lokali ta’ Kerala qal li ħafna minn dawk li mietu tkaxkru mill-ilmijiet u anke nqabdu taħt it-tiġrif minħabba li f’divesi żoni ċediet l-art. L-awtoritajiet iddikjaraw stat ta’ emerġenza u anke l-ajruport mhux mistenni jibda jopera qabel ġimgħa u nofs oħra.