Kronaka
AĠĠORNAT: Id-Dwana bl-akbar qabda ta’ prodotti foloz

Id-Dwana kkonfiskat 36 kontejner fil-Freeport li nstabu mimlija b’eluf ta’ prodotti foloz. Id-Dwana qalet li din hija l-akbar konsenja tax-xorta li qatt inqabdet f’daqqa fl-istorja tagħha; darbtejn u nofs aktar mill-akbar konsenja maqbuda s’issa.

Uffiċjali tad-Dwana għaddejjin b’ħidma biex ibattlu 36 kontejner li nstabu fil-Freeport ppakkjati b’eluf ta’ prodotti foloz. Ix-xogħol qed isir minn uffiċjali tad-Dwana f’taqsimiet differenti fosthom it-Taqsima tal-Moniteraġġ tal-Kontejners, tal-Iscanning u tal-Proprjetà Intelletwali. Fi stqarrija d-Dwana spjegat li din il-hidma mistennija tieħu ġranet biex tintemm u li fiha qed jagħtu sehem ukoll il-ħaddiema tal-Freeport Terminals u membri tas-sigurtà tal-Korporazzjoni tal-Freeport.

Id-Dwana qalet li s-36 kontejner kienu parti minn konsenja ta’ 44, li minhom tmienja biss kienu skont il-liġi. Intqal li bil-ħsieb li l-ħaddiema tad-Dwana jiġu ngannati, il-prodotti foloz kienu moħbija wara l-ewwel għoxrin pied mill-bieba ta’ kull kontejner, bl-ewwel parti ta’ kull kontejner kien fiha prodotti leċti. Din il-mossa iżda ma rnexxietx għax dak li l-uffiċċjali tad-Dwana ma rnexxilhomx jaraw b’għajnejhom ġew identifikati permezz ta’ l-iscanner sofistikat li d-Dwana għandha fil-Freeport.

Il-kontejners, li oriġinaw minn pajjiżi fl-Asja, kienu sejrin lejn pajjiż fl-Afrika. Fl-ewwel tmien kontejers li tbattlu kien hemm prodotti ta’ ditti rinomati fosthom 91,750 aċċessorji tal-mobiles, kważi 47,000 biċċa ħwejjeġ, 44,000 par żarbun sportiv, aktar minn 14,000 tracksuit, 7,770 par żarbun u 750 game controller.

Għad-Dwana ta’ Malta din hija l-akbar konsenja ta’ kontejners li qatt ikkonfiskat f’daqqa, u qed tistenna li meta jkunu tbattlu l-kontejners kollha jintlaħaq ammont rekord ta’ prodotti foloz maqbuda. Lokalment, l-akbar konsenja ta’ prodotti foloz maqbuda fil-passat kienet ta’ ħmistax-il kontejner.

Aħbarijiet Oħra

Id-Dipartiment tal-Protezzjoni Ċivili għandu vettura ġdida biex tagħmilha iktar possibbli biex jiġu salvati nies jekk jinqala’ xi inċident f’bini għoli. Il-vettura nxtrat mill-Awtorità tal-Ippjanar hekk kif fl-aħħar snin żdiedu l-binjiet…

Mart il-President ta’ Malta, is-sinjura Miriam Vella qalet li tifhem eżatt il-bżonn ta’ iktar għarfien fuq il-kanċer tas-sider għax tilfet lill-ommha b’dan il-kanċer. Is-sinjura Vella din is-sena hija l-Patruna tal-kampanja…

Il-Kummissjoni Elettorali tal-Partit Nazzjonalista fi stqarrija qalet li llum għamlet il-verifiki kollha u ġie konkluż li n-numru ta’ tesserati eleġibbli biex jivvutaw fl-elezzjoni għall-ħatra ta’ Kap tal-Partit Nazzjonalista huwa 21,499….

Uffiċjali mill-Awtorità tas-Saħħa u s-Sigurtà fuq il-post tax-xogħol, l-OHSA qegħdin jiċċertifikaw li kull skola f’Malta u Għawdex hija konformi mar-regolamenti li tfasslu mill-awtoritajiet tas-saħħa. F’kummenti ma’ Television Malta, is-Segretarju Permanenti…

Aktar