COVID-19
4 każijiet ġodda ta’ Covid-19 f’Malta – 8 oħra mfejqa

Ikkonfermati 4 każijiet ġodda ta’ Covid-19 f’Malta, bin-numru totali ta’ każijiet issa tela’ għal 431, li minnhom 126 persuna huma mfejqa, hekk kif illum tħabbru li fiequ 8 persuni oħra.

Waqt konferenza stampa dwar is-sitwazzjoni attwali f’pajjiżna fl-isfond tal-Covid-19, is-Supretendent għas-Saħħa Pubblika Charmaine Gauci qalet li b’hekk f’Malta fadal 302 każijiet attivi.

“Dawn it-tmien persuni li fiequ għandhom etajiet differenti, erbgħa ’l fuq minn għoxrin sena. Wieħed ’il fuq minn 30 sena , wieħed madwar erbgħin sena, wieħed sittin sena, u wieħed sebgħin sena, u hekk kif qed taraw l-etajiet ivarjaw u jikkorispondu wkoll mal-għadd ta’ każi pożittivi,” qalet Prof Gauci.

Ilbieraħ saru 574 test, li minnhom irriżultaw l-erba’ każijiet il-ġodda.

Il-każi l-ġodda jinvolvu raġel ta’ 59 sena li ma jaħdimx u għalhekk l-awtoritajiet tas-saħħa qegħdin f’kuntatt mal-familja tiegħu. Huwa beda bis-sintomi fis-17 ta’ April bis-sogħla, qtugħ ta’ nifs u nuqqas ta’ tomgħa.

It-tliet każi l-oħra huma immigranti miċ-ċentru miftuħ ta’ Ħal Far li qegħdin taħt kwarantina. Dawn huma kollha rġiel, wieħed ta’ 24 sena mill-Marokk, ieħor ta’ 17-il sena mis-Somalja u ieħor ta’ 18-il sena mis-Sundan. Is-Supretendent tas-Saħħa Pubblika qalet li issa l-każi t’a persuni pożittivi għall-Covid-19 f’dan iċ-ċentru huwa ta’ 38.

Sadanittant, tista’ ssegwi l-konferenza sħiħa hawn:

Gepostet von Television Malta am Montag, 20. April 2020

Ara wkoll:

Il-pjan għal bini ta’ sptar ġdid tal-Coronavirus għadu fis-seħħ

Hemm 37 bil-Covid-19 fl-isptarijiet – l-ebda immigranti minn Ħal Far