Abela: il-Kap tal-PN m’għandux jistenna iżjed biex jissospendi lil Giovanna Debono

Id-Deputat Mexxej tal-Partit Laburista Toni Abela qal li l-Kap tal-Partit Nazzjonalista Simon Busuttil m’għandux jistenna iżjed biex jissospendi lill-membru parlamentari Giovanna Debono kemm mill-Partit Nazzjonalista u wkoll minn membru parlamentari. Dr. Abela semma wkoll l-allegazzjoni fuq il-membru parlamentari Nazzjonalista Toni Bezzina u qal li jidher li kienet stil ta’ kondotta tal-Partit Nazzjonalista fil-Gvern li jqabbad nies jagħmlu x-xogħlijiet fuq spejjeż tal-Gvern.

F’konferenza tal-aħbarijiet dwar is-sentejn ta’ Gvern Laburista, Dr. Abela qal li l-Fond Monetarju Internazzjonali, l-Unjoni Ewropea u l-Aġenzija Fitch kollha qed isostnu li l-ekonomija ta’ Malta hi fost l-aħjar u tispira l-fiduċja. Qal li l-Partit Laburista fil-Gvern żera’ l-fiduċja fin-nies billi ma tax sorpriżi u baqa’ għaddej business as usual. Dr. Abela qal li bil-kontijiet imraħħsa tad-dawl, il-familji ħadu r-ruħ u żdid it-tfaddil fil-banek.

Toni Abela qal li l-Partit Laburista ma jistax madankollu ma jiżvelax ċerti abbużi li qal kienu jsiru mill-Gvern ta’ qabel u qal li għalkemm il-Partit Nazzjonalista għaddej b’kampanja li jgħid li hu differenti, il-poplu Malti ried jara d-differenza sakemm kien għadu fil-Gvern. Sostna li l-akbar problema tal-Partit Nazzjonalista hi l-kredibbilità. Dwar il-każ tal-Cafe’ Premier, Dr. Abela qal li l-Gvern ħa kont ta’ dak li ġara u qal li min-naħa l-oħra, b’dan il-każ, il-Partit Nazzjonalista ried jimplika li s-sidien tal-Cafe’ Premier taw il-flus lill-Partit Laburista waqt li sostna li kienu taw il-flus lill-Partit Nazzjonalista.

Aħbarijiet Oħra
Edukazzjoni

Fix-xhur tas-sajf, meta ħafna mill-iskejjel ikunu baħħ, il-Ministeru tal-Edukazzjoni ħa l-okkażjoni jwettaq xogħlijiet ta’ manutenzjoni u tisbiħ u faċilitajiet ġodda fi kważi 100 skola tal-Gvern madwar Malta u Għawdex. Ħafna…

Kultura

Għaddej ir-restawr tal-eqdem binja fil-Mellieħa . . . kumpless ta’ tmintax-il kamra li kienu nbnew biex joffru spazju għal ftit ħin ta’ mistrieħ lill-pellegrini li jżuru s-santwarju tal-Madonna tal-Mellieħa. Il-qagħda…

Kostruzzjoni

L-Assoċjazzjoni tal-Iżviluppaturi (MDA) tikkundanna r-rimi illegali ta’ skart tal-kostruzzjoni f’postijiet pubbliċi. Dan l-assoċjazzjoni qalitu fi stqarrija wara t-tħassib li wera l-pubbliku fuq il-media soċjali, f’dak li għandu x’jaqsam mar-rimi ta’…

Lokali

Il-Prim Ministru Joseph Muscat qal li l-Gvern ma jistax jindaħal biex iwaqqaf kawżi ċivili li jkunu nfetħu minn ċittadini privati jew minn terzi kontra ġurnalisti li jkunu ġew nieqsa u…

Aktar