Avjazzjoni
AirX iċċertifikata minn TM biex issewwi l-ajruplani

Il-kumpanija AirX Jet Support Malta ngħatat iċ-ċertifikat mid-Direttorat tal-Avjazzjoni Ċivili fi Transport Malta biex tkun tista’ tagħmel manutenzjoni fuq tliet tipi ta’ ajurplani differenti.

B’dan iċ-ċertifikat, magħruf bħala EASA Part 145, din il-kumpanija se tkun tista’ tagħmel manutenzjoni fuq ajurplani tat-tip Airbus, Boeing 737 u l-Embraer ERJ-190/Lineage 1000.

Fi stqarrija TM qalet li hija kommessa li tkompli taħdem biex din l-industrija tkompli tikber, u li xhieda ta’ dan huma l-investiment riċenti li għamlet AirX, u kumpaniji oħra bħal Britten Norman, Avion u Tag Aviation.

Intqal li din l-industrija għandha l-ogħla standards, b’ aktar minn 3,200 impjegat, filwaqt li tikkontribwixxi 2.5% tal-prodott domestiku gross ta’ pajjiżna.

L-AirX għandha flotta ta’ 21 ajruplan minn 6 kategoriji differenti, b’żewġ ajurplani minnhom qegħdin fl-Istati Uniti. Il-kumpanija AirX għandha l-pjan li tkompli tespandi l-flotta tagħha bil-ħsieb ta’ aktar investiment f’ pajjiżna.

Il-Kap Eżekuttiv, Houssam Hazzoury, qal li Malta hija post strateġiku fejn iżżomm l-ajurplani, u li jħares ‘il quddiem biex il-kumpanija tkompli tkabbar il-bażi ta’ manutenzjoni tagħha f’ pajjiżna.