Avjazzjoni
Ajruplan bi GRAZZI oħra . . . iwassal aktar provisti f’Malta

Kmieni dalgħodu wasal Malta f’titjira diretta miċ-Ċina ajruplan kbir tal-għamla Airbus A340-600 operat mil-linja tal-ajru Maleth-Aero u reġistrat Malta.

L-ajruplan beda l-vjaġġ ta’ madwar 11-il siegħa minn Nanjing fiċ-Ċina biex wassal Malta tagħmir u prodotti relatati mal-COVID-19.

Fuq l-ajruplan tispikka l-kelma “Grazzi” għan-National Health Service, is-servizz tas-saħħa tar-Renju Unit, li bħal oħrajn fid-dinja nkluż f’Malta qed ikomplu jagħmlu l-almu tagħhom kollu biex ilaħħqu mal-pandemija.

Mill-bqija, skiet li jtarrax fil-mitjar.  Għal-lum kien hemm skedata titjira waħda tal-Air Malta lejn Heathrow.  Fil-ħin li crew ta’ Television Malta kien fuq  il-post osservajna ajruplan King Air B200 tal-Forzi Armati ta’ Malta jagħmel taħriġ fuq ir-runway prinċipali, kif juru l-filmati hawn taħt.