Lokali
Aktar skrutinju u spezzjonijiet lill-kumpaniji tal-logħob fil-ġlieda kontra l-ħasil tal-flus

Il-kumpaniji tal-logħob f’Malta inklużi l-casinos issa għandhom livell ieħor ta’ skrutinju mill-Awtorità tal-Logħob u l-FIAU biex jiżdiedu l-kontrolli ħalli dawn il-kumpaniji ma jservux għal ħasil tal-flus. Dan qed isir wara li f’Diċembru li għadda, Malta daħlet fil-liġijiet tagħha r-raba’ direttiva tal-Unjoni Ewropea kontra l-ħasil tal-flus. L-Uffiċjal tal-Infurzar fi ħdan l-Awtorità tal-Logħob Dominic Micallef stqarr ma TVM li anke f’din l-industrija jista’ jkun hemm il-periklu tal-ħasil tal-flus, tant li anke qabel daħlu dawn ir-regolamenti, l-Awtorità rtirat il-liċenja ta’ għaxar kumpaniji, l-aktar Taljani.

Il-280 kumpanija tal-logħob f’Malta ġew infurmati mill-Awtorità tal-Logħob li ser ikunu suġġetti għal livell ieħor ta’ skrutinju u spezzjonijiet mit-taqsima speċjalizzata li ser tkun qed tħares speċifikament biex tisgura li fl-operat tagħhom, dawn il-kumpaniji, bħal banek qed jieħdu l-prekawzjonijiet kollha biex jevitaw li jkunu mezz għal ħasil tal-flus.

L-Uffiċjal tal-Infurzar tal-Malta Gaming Authority Dominic Micallef qal lil TVM li dan qed isir wara ħidma li saret tul l-aħħar sentejn mal-FIAU bi tħejjija għall-implimentazzjoni ta’ dawn ir-regolamenti. Qal li l-uffiċjali tal-Awtorità ngħataw taħriġ minn esperti Maltin u Barranin biex ikunu jistgħu jagħmlu skrutinju effettiv kontra l-ħasil tal-flus. Is-sur Micallef qal li issa l-kumpaniji tal-logħob għandhom obbligi ġodda li jridu jsegwu.

Is-sur Micallef qal li l-Awtorità ser tkun qed taħdem viċin mal-FIAU fl-implimentazzjoni ta’ din id-direttiva kontra l-ħasil tal-flus. Huwa qal li sa mill-2004, il-kumpaniji tal-logħob f’Malta diġà kellhom regolamenti biex ma jservux għal ħasil tal-flus. Żied jgħid li fir-regoli l-ġodda, l-obbligi tagħhom ser jiżdiedu waqt li ser tiżdied ukoll is-supervizzjoni fuqhom mill-uffiċjali tal-infurzar tal-Awtorità tal-Logħob.

Aħbarijiet Oħra
Lokali

Minkejja li 30 sena ilu tilef nofs wiċċu u sofra ġrieħi gravi meta ġġarraf b’ajruplan żgħir, il-bdot Ivan Gatt ma jibżax jirkeb l-ajruplan, la bħala bdot u lanqas bħala passiġġier….

Lokali

Numru ta’ proprjetajiet tal-Gvern li mhumiex jintużaw ser jgħaddu f’idejn għaqdiet mhux governattivi li joffru programmi ta’ housing bħala parti minn skema ġdida mnedija mis-Segretarjat Parlamentari għall-Akkomodazzjoni Soċjali. Is-sejħa għall-applikazzjonijiet…

Lokali

L-Awtorità tal-Ippjanar qalet li għamlet spezzjoni fil-barriera tal-Imqabba li skont artiklu fuq il-ġurnal The Times of Malta għexieren ta’ ħaddiema Torok li jaħdmu għal Taca Construction diġà qed jgħixu fis-sit, fejn…

Toroq

Il-Kummissarju għall-Ambjent u l-Ippjanar fl-uffiċċju tal-Ombudsman ma sabx li kienx hemm amministrazzjoni ħażina mill-awtoritajiet konċernati fl-iżvilupp ta’ Triq Louis Wettinger f’Ta’ Masrija, magħrufa bħala l-bypass tal-Mellieħa. Dan joħroġ mir-rapport tal-investigazzjoni…

Aktar