Barranin
Anzjani fil-Kanada ħadu damdima bla ħsieb wara ikla kannabis

Anzjani fil-Kanada kellhom iktar minn sempliċi indiġestjoni wara ikla fiċ-ċentru tal-komunità tagħhom f’Whitestone.

Uħud mill-anzjani kellhom jingħataw assistenza medika meta bdew iħossuhom storduti jew bdew jirremettu.

Mill-investigazzjonijiet ħareġ li l-anzjani kienu ngħataw kejk taċ-ċikkulata (chocolate brownies) li kien fih il-kannabis. Mhux kulħadd ħa minn dan il-kejk, peress li kien servut ma’ ikel ieħor fi stil ta’ buffet.

Il-Pulizija ta’ Ontario qed tinvestiga kif il-kannabis sabet ruħha f’dan il-kejk; jekk kienx inxtara bi żball mill-organizzatur, jew jekk kinitx ġiet miżjuda l-kannabis apposta.

Fil-Kanada l-kannabis ġiet legalizzata s-sena li għaddiet, iżda huwa reat li wieħed jagħti din is-sustanza lil persuni oħra mingħajr il-kunsens tagħhom jew biex jagħmel il-ħsara.