Lokali
Approvata mill-UNESCO l-mina taħt il-Belt li se tgħaqqad Tas-Sliema mal-Kottonera

Il-UNESCO tat l-approvazzjoni tagħha għall-proġett ta’ tħaffir ta’ mina taħt il-Belt Valletta li tgħaqqad ix-xatt ta’ Tas-Sliema mal-Kottonera għal servizz ġdid bil-baħar.

Dan il-proġett, li ġie propost mill-kumpanija AX Holdings wara sejħa pubblika minn Projects Malta għal ideat innovattivi għal mezzi ta’ trasport, ġie sottomess lil UNESCO minħabba li l-Belt Valletta hija fil-lista tal-UNESCO bħala wirt dinji.

Projects Malta se tissokta bil-proċeduri għal proġett ta’ mina taħt l-art fil-Belt Valletta, wara li nkisbet formalment l-approvazzjoni tal-UNESCO li dan il-proġett mhuwiex ta’ theddida għall-wirt storiku u arkitettoniku tal-Belt Valletta.

Il-Ministru Konrad Mizzi li fir-responsabbiltà tiegħu taqa’ Projects Malta, qal lil tvm.com.mt li b’din l-approvazzjoni, il-Gvern se jwettaq wegħda oħra li jiffaċilita t-trasport fil-Belt b’mezzi varji ta’ trasport pubbliku, li jgħaqqad Tas-Sliema mal-Kottonera.

“Wara proċess rigoruż li analizza l-proposta ta’ AX Group, il-UNESCO ħabbru li dan il-proġett jissodisfa l-kriterji kollha biex iseħħ u li mhu se jipperikola bl-ebda mod il-Belt Valletta,” qal il-Ministru Mizzi.

Il-proġett se jkun jenħtieġ li titħaffer mina taħt l-art b’tul ta’ 800 metru, biex minnha tgħaddi dgħajsa. Dan se jfisser li s-servizz bil-baħar ikun possibbli anki jekk ikun il-maltemp.

Fi ftit tal-ġimgħat oħra mistenni jiġi ffirmat il-ftehim bejn il-Gvern u l-Grupp Ax Holdings, li se jinvesti għaxar miljun ewro. Mistennija jkunu involuti l-inġiniera barranin li ħadmu fuq il-mini li saru bħala parti mill-proġett Nazzjonali għat-taffija tal-għargħar. Il-Grupp Ax Holdings kien qed jimmira li dan il-proġett ikun lest sas-sena 2018, meta l-Belt Valletta tkun il-Kapitali Ewropea tal-Kultura fl-2018.

Aħbarijiet Oħra
Budget

Il-Ministru għall-Finanzi, Edward Scicluna qal li l-Budget ippreżentat ilbieraħ u r-reazzjoni ġenerali għalih huma turija li l-Gvern hu konxju tal-isfidi, l-opportunitajiet u l-ħtiġijiet tan-nies. F’konferenza tal-aħbarijiet l-għada tal-Budget, il-Ministru Scicluna…

Saħħa

Kull sena f’Malta jfeġġu madwar 20 każ ta’ kanċer fit-testikoli. Hu stmat li kull sena jmutu żewġt irġiel b’dan il-kanċer. Stħarriġ li sar ix-xahar li għadda wera li tnejn minn…

Kronaka

Lejlet it-tieni anniversarju mill-qtil ta’ Daphne Caruana Galizia tnieda rapport imħejji minn Reporters Without Borders u The Shift News dwar ċ-ċirkostanzi li fihom seħħ il-qtil, l-investigazzjoni li saret dwaru, ir-reazzjoni…

Immigrazzjoni

L-AFM għaddejja b’operazzjoni ta’ salvataġġ biex issalva 76 immigrant, fosthom 15-il mara li wħud minnhom qed iġorru tarbija, li jinsabu f’diffikultà bejn sema u ilma. Id-dgħajsa, li fuqha jinsabu l-immigranti,…

Aktar