Lokali
ARA: Il-Gvern sorpriż b’li qal Di Maio dwar Malta u l-interconnector

Il-Gvern qal li Malta tixtri b’rati kummerċjali l-enerġija mill-grid Ewropew li mbagħad titwassal fil-pajjiż permezz tal-interconnector mill-Italja. Il-Gvern qal ukoll li l-ftehim dwar l-operat tal-interconnector hu skont ir-regoli Ewropej.

Il-Gvern Malti kien qed jirreaġixxi fi stqarrija għall-kummenti tad-Deputat Prim Ministru Taljan, Luigi di Maio, li pprova jorbot l-interconnector mal-kwistjoni dwar l-immigrazzjoni.

Fil-programm Porta a Porta fuq Rai Uno, Di Maio qal li l-Italja tagħti l-elettriku lil Malta u Malta rrifjutat li tgħin l-immigranti abbord il-vapur Aquarius, li skont id-Deputat Prim Ministru Taljan kien fiż-żona ta’ tiftix u salvataġġ fir-responsabbiltà ta’ Malta. B’din id-dikjarazzjoni, Luigi Di Maio ta x’jifhem li l-Italja qed tagħti l-elettriku b’xejn lil Malta.

Il-Gvern Malti qal li jinsab sorpriż bid-dikjarazzjoni ta’ Di Maio u saħaq li fil-kwistjoni tal-vapur Aquarius aġixxa skont ir-regoli internazzjonali. Il-Gvern qal li hu fiduċjuż li l-awtoritajiet kompetenti Taljani se jiġbdu l-attenzjoni ta’ Di Maio għall-fatti dwar l-operat tal-interconnector, li l-Gvern Malti saħaq hu mmexxi skont is-saltna tad-dritt.

Il-Gvern qal li bl-investimenti li saru fl-aħħar snin fl-impjanti f’Delimara, Malta tiġġenera biżżejjed elettriku għall-ħtiġijiet tagħha u l-interconnector jintuża bħala parti mill-politika ta’ enerġija minn sorsi differenti.

 

Aħbarijiet Oħra
Infrastruttura

Wara li tqanqlu bosta oġġezzjonijiet għall-ftehim propost dwar il-kuntratt ta’ ċens ta 99 sena mal-grupp Corinthia, jidher li sar progress fuq xi bidliet fil-kuntratt li permezz tiegħu l-Corinthia ser tkun…

Kumpaniji

Toly Products hi l-eqdem fabbrika fil-qasam industrijali ta’ Bulebel, mnejn ilha topera kważi ħamsin sena. Minn bidu modest b’erbgħin impjegat matul is-snin, il-fabbrika kompliet tikber u llum timpjega 400 ħaddiem,…

Kronaka

Żewġ persuni jinsabu bi ġrieħi ta’ natura gravi wara li faqqa’ argument bejn 7 persuni fi Triq Villabate, f’Ħaż-Żabbar. L-argument seħħ għall-ħabta tal-16:00 meta mara ta’ 26 sena residenti f’Bormla…

Aktar