Barranin
ARA: F’dagħdigħa jaqbżilhom ‘il barra mill-arena

Barri fferoċjat kellu bżonn biss salt wieħed biex jaqbeż ‘il barra mill-arena waqt esebizzjoni tradizzjonali li kienet qed issir fil-kapitali Spanjola.

Il-barri kien qed jaħbat għall-matador, li beda jistaħba wara grada tal-injam magħmula apposta. Iżda minflok ma waqaf quddiem il-grada, f’dagħdigħa l-barri qabeż minn fuqha u baqa’ nieżel fil-kuridur li jifred lill-udjenza mill-arena.

Dak il-ħin f’dan il-kuridur kien hemm matador ieħor, li b’ħeffa qabeż ‘il barra għal ġol-arena, filwaqt li ħaddiem ieħor fetaħ il-grada biex il-barri jerġa’ joħroġ fl-arena. Dan ukoll kellu jaqbeż b’ħeffa minn fuq l-ilqugħ biex ma jintlaqatx mill-barri.

B’piż ta’ 576 kilogramma, il-barri huwa tar-razza Miura minn Sevilla, li huma magħrufa għas-saħħa u l-intelliġenza. Dawn huma fil-fatt l-iktar barrin li qatt qatlu matadori, u jintużaw biss fl-iktar areni prestiġjużi.

L-inċident seta’ kellu konsegwenzi ferm iktar serji, hekk kif fil-passat il-barri ġieli saħansitra spiċċa qalb l-udjenza.