Kultura
ARA: Għadek tiftakarhom dawn il-karozzi tal-linja?

Sala Speranza fl-Isptar Monte Karmeli nbidlet f’vetrina ta’ kollezzjonijiet minjaturi ta’ aktar minn elf u ħames mitt mudell, fosthom mudelli ta’ karozzi tal-linja antiki maħduma bl-idejn.

Mudelli antiki tal-karozzi tal-linja maħdumin bl-idejn, bir-rotot u l-kuluri differenti, qed jagħtu bixra nostalġika fil-wirja annwali tad-Die Cast & Scale Model Society li qed tittella’ fl-Isptar Monte Karmeli.

“Hawnhekk naraw ir-rotot ta’ Birkirkara, li kien l-unika lokal li kellu żewġ rotot. Minn Birkirkara għall-Belt u Birkirkara għal San Ġiljan, kif ukoll ta’ Birżebbuġa, bil-kuluri tar-raħal li għadhom jintużaw sal-lum, u tal-Mellieħa abjad fil-faxxi lesti,” spjega Alan Saliba, President tad-Die Cast & Scale Model Society.

Alan Saliba qal li l-kuluri tax-xarabanks kellhom skop partikolari. “Kien hawn ħafna nies illitterati, allura ma kinux jafu jaqraw in-numri jew l-isem tal-lokalità. Għaldaqstant kienu jagħrfu x-xarabank li tkun qed toqrob permezz tal-kulur.”

Din il-kollezzjoni ta’ xarabanks hi waħda minn 33 kollezzjoni li jvarjaw minn mudelli ta’ karozzi antiki għal mudelli kummerċjali u anki sportivi, fosthom kollezzjoni ta’ karozzi ta’ ditta li din is-sena għalqet 50 sena.

“Ħafna minnhom iqisuha li hu toy. Fil-fatt huwa collector’s item illum il-ġurnata, u qed inħajjar lil ibni li mill-kollezzjoni li hawn, biex jibda jġemma’ dawn it-tip ta’ karozzi,” qal il-kollezzjonist Stephen Borg.

Għal Stephen Borg, li jaħdem fil-ħadid, dawn il-mudelli għandhom sinifikat,anki ambjentali. “Illum il-ġurnata qed isiru minn ħadid riċiklat, allura minn xi ħaġa li aħna narmu, qed toħloq xi ħaġa li se tibqa’ għal dejjem għall-kollezzjonisti.”

Sydney Zammit, li hu mekkanik irtirat, għandu namra għall-mudelli ta’ karozzi tas-servizzi, fosthom dawk tat-tifi tan-nar. “Dejjem ġo fija kienu l-karozzi. Illum m’għadnix narma u nsewwi karozzi ta’ vera, imma għall-inqas baqa’ ġo fija għax għandi mudelli, ġieli mmodifikajthom jien ukoll.”

Fost attrazzjonijiet oħrajn, mudell tal-ajruport ta’ Malta komplut bl-ajruplani u mudell ta’ ċirklu komplut sal-inqas dettall. Il-wirja se tibqa’ miftuħa sal-Ħadd.

Aħbarijiet Oħra
Turiżmu

Il-Maltin jivjaġġaw l-iżjed bl-ajru, u skont statistika tal-Eurostat, 63 fil-mija tal-vjaġġi tal-Maltin fl-2017 saru bl-ajru. Dan ipoġġi lil Malta fl-ewwel post, anke meta mqabbel ma’ gżejjer oħra. Fil-fatt, filwaqt li…

Qorti

Fil-Qorti llum ngħalqu l-provi kontra Liam Debono, li qed ikun akkużat bl-attentat ta’ qtil tas-Surġent Simon Schembri fil-15 ta’ Mejju 2018. Il-proċeduri issa mistennija jkomplu billi jinħareġ l-Att ta’ Akkuża…

Politika

L-Assemblea Parlamentari tal-Kunsill tal-Ewropa li tirrappreżenta 47 pajjiż, approvat rapport kritiku dwar is-saltna tad-dritt f’Malta li tħejja mill-Parlamentari Olandiż Pieter Ormtzigt. Ir-rapport ġie approvat bit-72 vot favur, 18-il vot kontra…

Propjetà

Il-membru tal-Bord tal-Ippjanar tal-Awtorità tal-Ippjanar, Matthew Pace, mhuwiex preżenti għal-laqgħa tal-lum li fiha qed tkun diskussa l-applikazzjoni għall-proġett Townsquare t’Tas-Sliema. Il-ġimgħa li għaddiet il-Qorti tal-Appell sabet li s-Sur Pace kellu…

Aktar