Barranin
ARA: Għalliem jogħla fl-arja biex jispjega l-gravità

Il-lezzjonijiet ta’ għalliem tax-Xjenza fl-Istati Uniti spiss jieħdu xejra mhux tas-soltu, u jidher li huma apprezzati ferm mill-istudenti.

L-għalliem Jonathan Clark, li huwa wkoll atleta tal-basketball, hija l-hena tiegħu jaqbeż fil-għoli u jagħmel manuvri fl-arja biex idaħħal il-ballun fix-xibka.

F’wieħed mill-filmati fuq Twitter, Clark jidher jiġi bil-ġirja u jaqbeż minn fuq ras student adoloxxenti li jinsab wieqaf quddiem il-bieb, iżda mhux biss. Sakemm ikun fl-arja Clark jirnexxielu wkoll jgħaddi l-ballun minn bejn saqajh, qabel ma jwaddbu fix-xibka.

F’filmat ieħor, li fih din id-darba Clark idur fl-arja qabel jagħmel l-istess manuvra, b’nofs ċajta jgħid li qed ikollu biċċa xogħol iebsa biex jispjega l-liġi tal-gravità lill-istudenti, jekk kull darba jirnexxielu jisfidaha bil-qabżiet tiegħu.