Politika
ARA: Il-PM jemmen li sentejn kienu ftit wisq għan-negozjati ta’ Brexit

Il-Prim Ministru Joseph Muscat qal li r-realtà fid-drama dwar Brexit hi li jiġri x’jiġri, l-UE se tkun qed ittawwal il-ħruġ tar-Renju Unit mill-UE b’ġimgħa biss, għax jekk il-ġimgħa d-dieħla il-Parlament tar-Renju Unit ma japprovax il-ftehim għal ħruġ mill-UE, l-estensjoni għat-22 ta’ Mejju, Ġunju jew data oħra tkun inutli.

F’kummenti lil TVM waqt li qed jattendi s-Summit tal-mexxejja tal-UE fi Brussell, Dr Muscat qal li d-data ġdida għal Brexit hi sekondarja u akkademika, għax sa issa għad ma nafux jekk il-ġimgħa d-dieħla l-House of Commons hux se jitħalla jivvota fuq il-ftehim ta’ ħruġ mill-UE għat-tielet darba u wisq aktar jekk hux se jerġa’ jivvota kontrih jew le kif għamel fiż-żewġ okkażjonijiet preċedenti.

Il-Prim Ministru qal li l-mexxejja tas-27 pajjiż-membru qed jaqblu li jagħtu estensjoni qasira għal Brexit kemm-il darba l-ġimgħa d-dieħla il-Parlament tar-Renju Unit japprova l-ftehim għal ħruġ. Dr Muscat qal li l-UE u Malta qed iħejju għal kull eventwalità fosthom li l-ġimgħa d-dieħla r-Renju Unit joħroġ mill-UE mingħajr ftehim, xi ħaġa li l-Prim Ministru qal li issa qed issir aktar realistika minn qabel.

Il-Prim Ministru qal li aktar milli diżappuntat bil-mod kif żviluppat il-kwistjoni dwar Brexit ma jinsabx sorpriż għax kienet ċara mill-bidu nett kif bassru bosta analisti politiċi.

“Kont qed nara l-kotba tal-istorja, biex ir-Renju Unit ħarġet minn Malta il-ftehim ġie ffirmat f-1972 u damu seba’ snin biex ħarġu minn pajjiżna u ħallsu l-ekwivalenti ta’ €1.5 biljun, biex iddum seba’ snin biex toħroġ minn Malta, naħseb sentejn biex toħroġ mill-UE ftit wisq,” qal il-Prim Ministru.

Ara wkoll:

Il-Prim Ministru u Donald Tusk jiddiskutu Brexit u l-Budget tal-UE 2021-2027

Aħbarijiet Oħra
Kronaka

Raġel ta’ 33 sena, residenti l-Qrendi, jinsab fil-periklu tal-mewt wara li waqa’ madwar żewġ sulari f’Ħal Luqa. Kienu għall-ħabta tal-10am, xħin il-Pulizija ġiet infurmata li kien hemm bżonn l-assistenza tagħha f’residenza…

COVID-19

Ma nistgħux ngħidu li Malta ħielsa għalkollox mill-Coronavirus. Dan qalitu l-Professur Charmaine Gauci waqt il-konferenza stampa tal-lum hekk kif spjegat li 1% min-nies li jmorru għat-testijiet u qed joħorġu pożittivi…

COVID-19

Ġie kkonfermat każ ieħor ta’ Coronavirus f’Malta mentri 9 persuni oħra issa jiżdiedu mal-485 persuni mfejqa. Dan ikkonfermatu s-Supretendent tas-Saħħa, il-Professur Charmaine Gauci waqt il-konferenza stampa tal-lum fejn qalet li…

Xogħol

Tnediet l-skema ġdida, il-Gozo Teleworking Scheme għall-ħaddiema Għawdxin li jaħdmu fis-settur privat f’Malta. Il-Ministru għal Għawdex, Clint Camilleri stqarr li din il-miżura soċjali tinċentiva l-bilanċ bejn ix-xogħol u l-familja. Il-Ministru…

Aktar