Kurżitajiet
ARA: Il-Professur Charmaine Gauci ssib postha f’xogħlijiet imnaqqxa tax-xagħar

L-arti hija kullimkien anke fis-sengħa tal-barbiera. Mhux biss jaqtgħu x-xagħar, iżda jirnexxielhom bi preċiżjoni u paċenzja kbira jnaqqxu personaġġi famużi fuq il-qurriegħa tal-klijenti tagħhom. Niskopru l-ħila ta’ barbier Marokkin, li ħoloq niċċa partikolari fis-sengħa tiegħu.

Jurgen Klopp, minn Anfield għal għand il-barbier. Mhux għal qata’ xagħar, imma biex wiċċu jiġi stampat fuq il-klijenti ta’ Radouan – barbier Marokkin li ġie Malta f’Diċembru li għadda. Għal Radouan, is-sengħa tal-barbier hija arti, għax żviluppaha b’mod li minn ritratt inaqqax il-wiċċ tal-kantant, artist, player jew coach tal-football fuq ras il-klijenti tiegħu. Sid il-ħanut tax-xagħar Simon Azzopardi qal li s-sengħa ta’ Radouan hija rfinuta sew.

”Kienet b’kumbinazzjoni. Beda jurina x’jaf jagħmel. Radouan ġibnih hawn Malta bħala barbier professjonali. Konnha qed nitkellmu u qalli li għandu dawn il-kapaċitajiet, beda jurihomli u n-nies bdew ġejjin.”

Sibna lista twila ta’ artisti, fosthom il-leġġendarju Freddie Mercury, maħdum b’perfezzjoni fuq dan iż-żagħżugħ dilettant tal-mużika tal-Queen..

”Din hija bicca xoghol unika, fis-sens hija biċċa arti, li teħodlok tliet sigħat, li klijent irid ikun jaf għal xiex ġej u li jrid iqatta’ tliet sigħat hawn.”

Mus, imqass u xemgħa tax-xagħar u naturalment idejn li kapaċi jduru b’ħeffa u preċiżjoni max-xagħar. Ghal Radouan, mhux biss players u artisti magħrufa.

Għax iċ-ċirkostanzi preżenti, ippermettew li jagħżel hu l-personaġġi għal qalbu, bħas-Supretendent tas-Saħħa Pubblika, il-Professur Charmaine Gauci, li kif daħlet f’qalb kulħadd, irnexxielha ssib postha fost ix-xogħlijiet li għamel dan il-barbier Marokkin li fuq manekkin irnexxielu jaħdem wiċċha.