Kronaka
ARA : Tfajla tmut f’inċident bil-mutur, involut trakk

Tfajla tilfet ħajjitha f’inċident tat-traffiku li seħħ tard is-Sibt bil-lejl. It-tfajla, li hija Ġermaniża, kienet passiġġiera fuq mutur misjuq mis-sieħeb tagħha, ġuvni Malti.

Minn tagħrif li kiseb TVM minn fuq il-post ftit ħin biss wara li seħħ l-inċident, jirriżulta li l-mutur kien tiela’ Vjal Santa Luċija, mill-Marsa, fid-direzzjoni ta’ Santa Luċija għall-ħabta tal-11.00p.m. F’nofs it-telgħa, is-sewwieq tal-mutur tilef il-kontroll tiegħu minħabba li fit-triq kien hemm xi ġebel u żrar, bil-konsegwenza li l-ġuvni u t-tfajla, it-tnejn ta’ 23 sena, waqgħu minn fuq il-mutur.

Inzerta li f’dak il-ħin, warajhom eżatt kien hemm trakk, misjuq minn Sqalli ta’ 43 sena, li ma kellux ċans li jieqaf, bil-konsegwenza li laqat lit-tfajla u nqabdet taħt it-trakk.

 

Immedjatament issejħet l-għajnuna ta’ tim mediku min Mater Dei. Fuq il-post waslet ambulanza flimkien mat-Tabib Jonathan Joslin, iżda  sfortunatament it-tfajla ġiet ċċertifikata mejta fuq il-post. Is-sewwieq tal-mutur, li huwa pulizija, ma weġġax. Madankollu huwa deher fi stat ta’ xokk qawwi.

Qraba tas-sewwieq tal-mutur qalu lil TVM fuq il-post li l-ġuvni u t-tfajla ilhom joħorġu flimkien għal dawn l-aħħar seba’ xhur. It-tfajla ilha Malta madwar sena.

It-triq ingħalqet mill-ewwel għat-traffiku, fejn bdew l-investigazzjonijiet tal-Pulizija mmexxija mill-Ispettur Sarah Zerafa mill-Għassa ta’ Raħal Ġdid. Il-Maġistrat tal-Għassa, Aaron Bugeja kien infurmat bl-inċident u ordna inkjesta. Huwa ħatar diversi esperti, fosthom it-Tabib Forensiku Mario Scerri, l-Espert Tekniku Mario Buttgieg, u l-Pulizija tal-Forensika.

Aħbarijiet Oħra
Lokali

Fil-Palazz tal-President, ingħataw il-ġurament tal-ħatra tliet Imħallfin u tliet Maġistrati ġodda. Il-ġuramenti tal-ħatra ngħataw mill-President George Vella li ħeġġeġ lill-Gvern biex ifassal u jimplimenta l-miżuri li jsaħħu l-indipendenza tal-ġudikatura kif…

Lokali

L-Awtorità tad-Djar qalet li qed toffri l-assistenza neċessarja lill-familji milquta mit-tiġrif ta’ parti minn blokka ta’ appartamenti fi  Gwardamanġa. Fi stqarrija l-Awtorità tad-Djar qalet li hija nfurmata li l-erba’ familji…

Ikel

Id-Direttorat għas-Saħħa Ambjentali fi ħdan is-Sovrintendenza tas-Saħħa Pubblika, jixtieq jinforma lill-pubbliku, li l-Palm Oil (Zomi oil) m’għandux jiġi kkunsmat minħabba li nstab li fih il-kulur Sudan IV li m’huwiex awtorizzat…

Kunsilli Lokali

Erba’ Kunsilli lokali ngħataw bejniethom €81,000 għaż-żamma u l-manutenzjoni ta’ proġetti li saru mill-Gvern ċentrali. Il-flus huma parti minn fond ta’ €200,000 li tnieda fil-budget wara lis-Segretarju Parlamentari Silvio Parnis…

Aktar