Eurovision
Ara: Ir-rebbieħ ta’ Sanremo jsellem lill-Maltin, jirnexxilu jgħaqqad għexieren ta’ eluf ta’ Taljani fi kwarantina

Tefa’ ta’ ġebla ‘l bogħod minn xtut pajjiżna f’Sanremo l-Italja fi Frar li għadda t-tbissima ġenwina u l-vuċi li tpaxxi ‘l-widna tal-kantant Diodato saħħret ‘il-pubbliku Taljan u mhux biss. Tant, li bil-kanzunetta ‘Fai Rumore’ rnexxielu jirbaħ il-festival ta’ Sanremo ta’ din is-sena.

Liema kanzunetta, fi ftit kliem tħeġġeġ lil dak li jkun ma jibżax joħroġ minn qoxortu u ma joqgħodx lura milli jsemma’ leħnu fejn meħtieġ. Diodato jfakkar li l-bniedem, fl-aħħar mill-aħħar, magħmul biex jitħaddet.

Bħalma f’dawn il-jiem Destiny ma kellhiex sabar biex tirrappreżenta l-gżejjer Maltin fil-Eurovision Song Contest, Diodato daqstant ieħor kellu seba’ mitt sena biex din il-ġimgħa jpaxxi miljuni ta’ dilettanti tal-mużika madwar id-dinja bil-vuċi tiegħu. Iżda, b’xorti ħażina, ir-realtà hija xort’oħra.

Minkejja li l-Eurovision ta’ din is-sena mhux se jsir, il-lirika tal-kanzunetta ta’ Diodato ma waqgħetx fuq widnejn torox hekk kif f’dawn l-aħħar jiem ‘Fai Rumore’ spiċċat kantata minn għexieren ta’ eluf ta’ Taljani mid-djar rispettivi tagħhom. Bħalma jixhdu għadd ta’ filmati fuq il-midja soċjali, bosta Taljani ttawlu mit-twieqi tagħhom, ħarġu fil-gallarijiet u ħonqu l-bjut ta’ darhom biex ilkoll ikantaw għadd ta’ kanzunetti minn qalbhom, b’mod speċjali dik li Diodato rebaħ Sanremo biha.

F’dan l-isfond, fkummenti lil tvm.com.mt, mistoqsi x’kienet ir-reazzjoni tiegħu hekk kif waslulu l-ewwel filmati mingħand in-nies, Diodato qal li qatt m’emozzjona ruħu daqshekk tul il-karriera mużikali tiegħu, lanqas dakinhar li rebaħ Sanremo.

Diodato spjega li anki jekk il-Eurovision din is-sena se jkollu jinqabeż, il-fatt li bosta għażlu li juru solidarjetà ma’ xulxin permezz tal-kanzunetta tiegħu għalih qisu rebaħ il-lotterija. Fissru, bħala ġest spontanju li m’hawnx prezzu.

Mistoqsi jekk qattx żar il-gżejjer Maltin, Diodato qal li qatt ma kellu x-xorti jiġi fostna. Madanakollu, filwaqt li sellem lill-Maltin, qal li ġaladarba l-ajruporti jerġgħu jiftħu l-bibien tagħhom, Malta se tkun fost l-ewwel pajjiżi li bi ħsiebu jżur bi ħġaru.