Edukazzjoni
ARA: It-tielet edizzjoni ta’ ‘Qaritona Nazzjonali’

Jisimgħu b’attenzjoni lill-ambaxxaturi tal-qari jaqrawlhom l-istejjer, l-istudenti tal-iskola Primarja taż-Żurrieq kienu l-protagonisti fit-tnedija ta’ ‘Qaritona Nazzjonali fl-iskejjel Primarji’ li għandha l-għan li żżid il-kultura tal-Qari.

It-tielet edizzjoni tal-Qaritona Nazzjonali qed tiġi organizzata mill-Malta Trust Foundation u l-Aġenzija Nazzjonali tal-Litteriżmu, bl-ambaxxaturi tal-qari ser ikunu Carmel Busuttil, Saviour Darmanin u Veronica Farrugia.

Iċ-Chairperson tal-Malta Trust Foundation Marie-Louise Coleiro Preca qalet li bil-qari iħejji lit-tfal biex ikunu ħassieba kritiċi u itejbu l-immaġinazzjoni. Il-President Emeritu qalet li fl-ewwel żewġ edizzjonijiet inġabru 250,000 ewro mill-isponsors u mit-tfal. Hija spjegat li b’donazzjoni għal kull ktieb li jaqraw ser ikomplu jinxtraw għodod diġitali u stampa għal tfal li jeħtieġu l-għajnuna.

“Diġa’ bbenefikaw tfal b’vista batuta ħafna u wkoll l-ewwel grupp ta’ tfal li huma fuq l-ispettur tal-awtiżmu u li ma jitkellmux. Din is-sena ser ikun hemmit-tieni grupp ta’ dawn it-tfal.”

Il-Ministru tal-Edukazzjoni Owen Bonnici qal li s-sistema edukattiva ser tkompli tiġi riformata biex tilqa’ għall-ħtiġijiet ta’ kull tifel u tifla bil-għan li ħadd ma jaqa’ lura fil-vjaġġ edukattiv.