Lokali
ARA: Kif qed jinqala’ l-vapur inkaljat fil-Qawra?

Mitt jum mill-ġurnata mindu tanker żgħir registrat fit-Togo nkalja fuq il-blat qrib iż-żona Ta’ Fra Ben, fil-Qawra, beda x-xogħol biex it-tanker jinqala’ minn mal-blat. Dan wara li ħarġu l-permessi meħtieġa u l-awtoritajiet approvaw il-metodu kif se jitneħħa t-tanker.

Il-kuntratt intrebaħ mill-kumpanija Cassar Ship Repair li saret is-sid il-ġdid tat-tanker. Il-ħidma se ssir taħt għajnejn uffiċċjali mill-Awtorità tal-Ambjent u Transport Malta u mhix se titlesta f’ħakka t’għajn.

“Fl-10 ta’ Frar li għadda meta t-tanker ta’ warajja nkalja fuq il-blat, il-kaptan tiegħu Joynal Abedin kien qalilna li kienet kwistjoni ta’ ħames minuti kollox biex it-tanker spiċċa fuq il-blat. Illum li bdiet l-operazzjoni biex it-tanker jerġa jinqala minn mal-blat, din issa mistennija tieħu 35 ġurnata,” qal iċ-Chairman u Direttur Maniġerjali ta’ Cassar Ship Repair, Tony Cassar.

Cassar qal li l-ħidma se tkun mifruxa f’fażijiet differenti. Wara li diġa’ tbattal il-fjuwil li kien hemm abbord it-tanker, il-ħaddiema xorta jridu jieħdu ħsieb inaddfu l-ftit fjuwil li fadal fl-engine room u l-lega taż-żejt li tifforma fit-tankijiet wara li jkunu assiguraw li t-tankijiet kollha jkunu ħielsa mill-gass u mingħajr ebda periklu.

Wara, isiru t-tiswijiet ta’ toqob u tiċrit li t-tanker għandu fil-qiegħ qabel il-vapur jintrefa minn fuq il-blat u jitniżżel lura fil-baħar permezz ta’ inġenji speċjalizzati. “Mhux se nużaw krejnijiet, se nużaw inġenji tal-baħar biex nipproteġuh milli jinqaleb. Imbagħad hemm towing. Se nużaw it-tug boats u l-inġenji tagħna, u wkoll għandna support minn Tug Malta.”

It-tanker imbagħad mistenni jiġi rmunkat għat-tarzna tal-kuntrattur fil-Marsa sabiex jiġi evalwat. Hemmhekk jiġi deċiż id-destin tiegħu.

Aħbarijiet Oħra
Annimali

Il-Kumitat Kontra l-Qtil tal-Għasafar (CABS) qal li fl-ewwel għodwa tal-insib diġà sabu żewġ każijiet ta’ abbuż. Fi stqarrija, il-CABS qal li membri tiegħu ġibdu l-attenzjoni tal-Pulizija li fl-Imtaħleb kien hemm…

Budget

Għada se jitħabbar it-tieni budget ta’ din il-leġislatura mill-Ministru tal-Finanzi Edward Scicluna. Filmat imxerred fuq il-mezzi soċjali ġie spjegat l-għan tal-Budget, li jgħolli l-kwalità tas-servizzi li joffri l-Gvern fosthom dawk tas-saħħa…

Ikel

Ħafna jiħduh bħala duwa meta jkollhom uġigħ fi griżmejhom jew għal taqlib fl-istonku, oħrajn iżiduh mal-kafè jew mat-te. Qed nirreferu għall-ġulepp tal-ħarrub li jissajjar bħal daż-żmien, hekk kif tibda toqrob…

Ġurnali

Ħarsa lejn l-istejjer ewlenin fil-ġurnali tal-lum The Sunday Times Fuq il-faċċata storja b’ritratt li tgħid li bini tal-Gvern fi Xrobb l-Għaġin li qabel kien jintuża mill-ex Prim Ministru Dom Mintoff…

Aktar