Kronaka
ARA: Kif tiġi analizzata d-droga li tinqabad mill-Pulizija jew mid-Dwana?

Id-droga li nqabdet ilbieraħ u sustanzi illegali oħra li jinqabdu mill-Pulizija jew id-Dwana jiġu analizzati f’laboratorju fl-Università ta’ Malta, li hu mgħammar b’teknoloġija li, fost l-oħrajn, tistabilixxi l-purità tad-droga. Fi kliem il-Professur Emmanuel Sinagra, il-purità mhix l-uniku ħaġa li tiddetermina l-prezz fis-suq, li jiddependi wkoll mid-domanda u l-provvista.

Fil-laboratorju tal-kromatografija fl-Universitá ta’ Malta tiġi analizzata ħafna mid-droga li tinqabad fil-gżejjer Maltin.

“Biex nispjega x’inhija kromatografija, naħseb li kulħadd poġġa xi naqra ‘food colouring’ jew linka fuq karta u l-kuluri jinfirxu b’mod differenti, minn hemm beda l-proċess,” fisser Prof. Emmanuel Sinagra, Kap tad-Dipartiment tal-Kimika tal-Università ta’ Malta.

Il-Professur Emmanuel Sinagra qalilna li l-proċess isir bl-użu ta’ tliet magni b’teknoloġija avvanzata. Spjega li l-kampjun tas-sustanza suspettuża jiġi injettat fl-ewwel magna li taħdem bl-użu ta’ coil jew kif magħrufa ‘kolonna’ li tissaħħan għal kważi tliet mitt grad celcius filwaqt li jiġi ppumpjat gass li jwassal biex joħorġu s-sustanzi.

“Pero dak mhux il-proċess kollu għax imbagħad trid tara l-finger prints tiegħu hawnhekk, qisek inti qed titfa’ salt nies itellqu madwar ċirkwit, u tgħid, naħseb rebaħ Hamilton, per eżempju, imma inti imbagħad trid tara l-ID card jew in-numru tiegħu li huwa Hamilton li rebaħ u dan jagħtina dik,” spjega Prof Sinagra.

Bil-ħsieb li jkun aċċertat li r-riżultati li jinħarġu fl-ewwel parti tal-proċess huma korretti, isir test ieħor f’magna oħra. Il-Professur Sinagra qal li wara dan il-proċess kollu, ir-riżultati jiġu analizzati biex tiġi stabbilità l-purità.

Skont rapport Ewropew dwar id-droga, il-purità tar-reżina tal-kannabis li tinqabad f’Malta tvarja bejn 4 u 11 fil-mija, tal-kokaina bejn 10 u 22 fil-mija waqt li l-purità tal-eroina tvarja bejn 15 u 30%.

“Il-prezzijiet tad-drogi jvarjaw u ma jvarjawx skont il-purità, l-aħħar drug report li nużaw aħna fuq il-prezz fis-suq f’Malta tad-drogi, cannabis resin jaf ileħħaq €30 kull gramma,” qal Prof Sinagra.

Il-Kap tad-Dipartiment tal-Kimika qal li l-blokka, jew is-sapuna, kif ġieli jirreferu għar-reżina tal-kannabis, ma jkollhiex wisq affarijiet miżjuda magħha, bħal fil-każ tal-kafà, paracetamol, zokkor jew sustanzi oħrajn li jitħalltu mal-kokaina jew l-eroina.

Aħbarijiet Oħra
Stejjer Umani

Tfajla ta’ 24 sena bil-kundizzjoni Bi-Polar qalet li minn ħajja solitarja u dipressiva, illum qed tgħix ħajja feliċi grazzi għal mara li qed tiddedika ħajjitha għal żgħażagħ b’diżabiltà. Fiona Ellul…

Lokali

Fis-sajf li ġej, grupp ta’ ċiklisti mil-LifeCycle ser jaqdfu elfejn kilometru fi tliet pajjiżi fl-Ażja biex ikomplu jinġabru fondi għar-riċerka fuq il-mard tal-kliewi u biex tkun iffinanzjata għajnuna psikoloġika għall-pazjenti…

Kultura

Fil-Mużew Marittimu fil-Birgu se jkun hemm esebizzjoni li tiċċelebra l-legat tal-esploratur marittimu, Jacques Cousteau, u l-konnessjoni tiegħu ma’ Malta permezz tal-vapur ‘Calypso’, li wara li baħħar bi vjaġġi bejn Malta…

Sport

Kumpanija Maltija li bbenefikat mill-programm nazzjonali ta’ Riċerka u Innovazzjoni, Fusion, bdiet tipproduċi sistemi ta’ dawl LED biex jintużaw f’kumplessi sportivi. F’kollaborazzjoni ma’ SportMalta, il-kumpanija Altern bdiet tinstalla sistema ta’…

Aktar