Internet
ARA: Kif tista’ taqla’ flejjes kbar bis-saħħa tal-YouTube?

Minn għada kull Malti li jagħmel videos u jtellgħahom fuq YouTube se jkun jista’ jidħol fi sħubija ma’ Google u jekk ikollu ħafna segwaċi u jilħaq ċertu kritierji jkun jista’ jirċievi ħlas.

Sa issa Malta kienet l-uniku pajjiż fl-Unjoni Ewropea li ċ-ċittadini tagħha ma setgħux jissieħbu fil-YouTube Partner Program li esperti fil-qasam jemmnu li jista’ jkun forma ta’ niċċa ekonomika ġdida.

Għaxar snin minn meta YouTube beda jidħol fi sħubija ma’ min joħloq l-aktar kontenut li jattira udjenzi fuq din il-pjattaforma soċjali, il-Maltin m’għadomx esklużi minn din l-opportunità.

Il-YouTuber Henry Galea qal “għadni kif ħadt aħbar tajba ħafna li YouTube aċċettat lil Malta fil-YouTube Partner Program biex il-Maltin bħali li huma vloggers ukoll ikunu jistgħu jaqilgħu xi ħaġa tal-flus billi juploadjaw il-videos fuq YouTube”

Fabian Borg, fundatur ta’ ‘Creators Malta’ qal li Maltin kienu l-uniċi fl-Unjoni Ewropea li ma setgħux jissieħbu f’dan il-programm u argumenta li l-Maltin huma t-tielet l-aktar li jsegwu videos fl-Unjoni Ewropea u n-numri ma kienux żgħar.

Spjega li kull min għandu gmail account jista’ jkun eliġibbli għal YouTube Parnter Program.

“Kif tilħaq 1,000 subscribers u jkollok 4,000 watch hours, iċ-channel ta’ min ikun jista’ jkun eliġibbli biex jibda jkollu reklamar minn Google servut fuq il-videos tiegħu stess”

F’Malta hawn bosta Youtubers – kif jissejħu dawk li jagħmlu videos regolari fuq YouTube – li jaf ikunu eliġibbli u saħansitra jaqilgħu il-flus minn Google.

Grandayy li għandu żewġ miljun subscriber fiċ-channel tiegħu li fih joħloq memes hu smat li jista’ jirċievi eluf ta’ ewro fis-sena waqt li Stella Cini li toħloq videos dwar ix-xagħar u s-sbuħija, għandha 263,000 subscriber u skont il-website socialblade, kapaċi tirċievi sa €36,000 fis-sena.

Fi kliem Fabian Borg din tista’ toffri ħafna opportunitajiet finanzjarji u ekonomiċi għall-Maltin.

“Karriera ġdida għall-Maltin fejn jistgħu jispiraw biex ikunu jistgħu jilħqu content creators u fl-istess ħin minbarra l-individwi għandek ukoll għaqdiet volontarji li jekk jiffukaw fuq il-videos li jtellgħu fuq channels bħal YouTube dawn jistgħu jibdew idaħħlu introjtu”

Dan l-iżvilupp seħħ wara petizzjoni li saret sentejn ilu u ġiet iffirmata minn aktar minn sitt elef persuna fosthom l-Ewroparlamentari Maltin kollha, il-Prim Ministru Joseph Muscat u terz tal-membri Parlamentari Maltin.

Fi stqarrija, l-Ewroparlamentari Francis Zammit Dimech qal li sena ilu kellu taħditiet dwar dan ma’ rappreżentanti ta’ Google u kien ingħata garanziji li l-isfidi legali kienu se jingħelbu fi ftit xhur.

Is-Segretarju Parlamentari Silvio Schembri qal li jinsab soddisfatt li wara diskussjonijiet ma’ Google f’Malta, żgħażagħ Maltin se jkunu qed jitħallsu tal-produzzjonijiet li jagħmlu fuq YouTube bħal żgħażagħ oħra Ewropej.

Aktar dettalji dwar content creators wieħed jista’ jidħol hawn.

Aħbarijiet Oħra
Lokali

Il-gvern ħabbar il-ftuħ tal-istaġun tal-insib tal-ħarifa għal żewġ speċi: il-pluviera u l-malvizz. Fi stqarrija tas-Segretarjat Parlamentari għall-Biedja, Sajd u Drittijiet tal-Annimali ntqal li wara li evalwa r-rakkomandazzjonijiet tal-kumitat Ornis, l-istaġun…

Sport

Fit-tielet logħba tagħhom fil-Kampjonat tal-Amateurs, it-tim ta’ Syria Gżira FC kiseb l-ewwel rebħa bl-iskor ta’ 3-1 kontra Fleur De Lys FC. Il-player Lucky Chizobor skurja żewġ gowls filwaqt li Julius…

Saħħa

Ilbieraħ filgħaxija għadd ta’ nies nġabru quddiem iċ-Ċentru Esplora fil-Kalkara għal mixja simbolika bħala parti mix-xahar iddedikat għall-għarfien dwar il-kanċer tas-sider, magħruf bħala Pink October. Din is-sena n-nisa u l-irġiel…

Lokali

L-invażjoni Torka fit-Tramuntana tas-Sirja ġiet ikkundannata mill-komunità Kurda f’Malta li bl-appoġġ tal-Moviment Graffitti organizzaw manifestazzjoni paċifika quddiem l-Ambaxxata Torka fil-Floriana. Huma kkundannaw dak li sejħu bħala assalt brutali u mingħajr…

Aktar