Lifestyle
Ara: L-anzjan li tella’ l-Black Pearl minn qiegħ il-baħar 40 sena ilu

L-iskuna Black Pearl li ilha fuq ix-xatt f’Ta’ Xbiex għal kważi erbgħin sena, tnissel memorji li ma jintesew qatt minn Vince Vella li bil-perseveranza tellgħaha darbtejn minn qiegħ il-baħar.

L-iskuna Black Pearl magħmula għall-baħar u baħħret fuq li baħħret, iżda fl-aħħar erbgħin sena ma missitx mal-ilma u kienet ixxamplata fuq il-blat fix-Xatt ta’ Xbiex fejn saret attrazzjoni.

Din l-iskuna kienet iġġorr il-merkanzija fl-ibħra Żvediżi u aktar tard intużat bħala jott lussuż. Daħlet Malta wara inċident meta l-magna tagħha nħakmet min-nirien. Minħabba l-ispejjeż biex tissewwa, sidha abbandunaha bil-konsegwenza li għerqet f’sebgħin pied taħt l-ilma fil-Port ta’ Marsamxett. Vince Vella li llum għandu tmenin sena jiftakar li kienu għaddewh biż-żmien meta flimkien ma’ ħuh iddeċieda li jtellgħu din l-iskuna u jirranġaha.

Vince Vella qal li “ma konniex nafu li kbira daqshekk, meta għodost l-ewwel darba, kienet qisha ġnien taħt il-baħar”.

Is-Sur Vella qal li biex tellgħu l-Black Pearl damu xahrejn u użaw elf tmien mija u tmenin tank taż-żejt. Flimkien ma’ ħutu għamel xhur sħaħ għaddej biex jirranġa din l-iskuna tal-injam li kellha ħsarat kbar.

Qatt ma basar li kellha tispiċċa wkoll fil-film Popeye li nħadem f’Malta wara li l-producer tal-films krewha mingħandu.

Fuq il-Black Pearl inħadmu diversi xeni bis-sehem tal-attur leġġendarju, il-mibki Robin Williams. Is-Sur Vella qal li waqt il-ġbid tal-film il-Black Pearl reġgħet ġiet mgħarrqa, u għax kellu qalbu marbut magħha, reġa’ tellagħha mill-qiegħ minn Popeye Village u reġa’ ħadha Ta’ Xbiex.

Is-Sur Vella qal li minkejja l-battikati li ħa flimkien ma’ ħutu, din l-iskuna tibqa’ għal dejjem marbuta ma’ qalbu.

Vince Vella qal li “qisha d-dar tiegħi, bqajt inħobbha għax kull fejn tmiss, id-demm tiegħi jaħbat magħha, għamilna xogħol kbir u ħadd ma weġġa’ u nispera li tibqa’ hemm”.

Vince jqatta’ sajf sħiħ fuq dghajsa li bena hu stess bl-isem oriġinali tal-Black Pearl, Aeolus. Jgħid li hemmhekk isib il-paċi, jaraha kuljum quddiemu u jorqod viċin tagħha biex ma jinsa qatt il-memorji fil-vjaġġ ta’ din l-iskuna li ma jista’ jintesa qatt.

 

Aħbarijiet Oħra
Lokali

Fl-aħħar disa’ snin il-Kumpanija Green Pak permezz tal-Kampanja ”Nirriċikla għall-Istrina” għaddiet lill-Community Chest Fund is-somma ta’ aktar minn mitejn elf ewro. Il-pubbliku qed jerġa’ jintalab jiġbor it-tappijiet tal-plastik u jgħaddihom…

Budget

Il-Prim Ministru Joseph Muscat qal li r-regoli Ewropej ma jippermettux lil Malta biex tagħmel kontrolli estensivi fil-fruntiera. Huwa rrikonoxxa l-kompetizzjoni inġusta li qed jesperjenzaw in-negozji ż-żgħar minħabba kuntrabandu li jidħol…

Immigrazzjoni

Il-vapur Ocean Viking, operat mill-għaqdiet mhux governattivi SOS Medieranee u Medecins Sans Frontieres, salva 36 immigrant ieħor minn fuq dgħajsa tal-injam li kienet f’diffikultà fl-ibħra Maltin. Kelliema għall-Forzi Armati qalet…

Qorti

Immigrant żagħżugħ ta’ 16-il sena li gidem uffiċjal tad-detenzjoni hekk kif prova jaħrab miċ-ċentru ta’ detenzjoni f’Ħal Safi jumejn ilu baqa’ miżmum arrestat. Iż-żagħżugħ irnexxielu jiddendel mal-fence taċ-ċentru tad-detenzjoni u…

Aktar