Barranin
ARA: Protesta silenzjuża mill-ħaddiema tas-saħħa fil-Belġju waqt żjara mill-PM

Il-Prim Ministru tal-Belġju Sophie Wilmes intlaqgħet minn protesta silenzjuża waqt żjara mhux uffiċjali fl-isptar Saint-Pierre fi Brussel nhar is-Sibt.

Il-ħaddiema tas-saħħa lebsin ilbies protettiv qagħdu f’żewġ ringieli jistennew il-wasla tal-Prim Ministru u tawha darhom malli wasslet il-karozza tagħha.

Il-protesta saret minħabba t-talba tal-ħaddiema tas-saħħa għal għarfien akbar tal-isforzi li qed jagħmlu u biex  jipprotestaw kontra digriet biex jiġu ngaġġati ħaddiem mhux kwalifikati sabiex jagħmlu xogħol tal-infermiera.

L-iskejjel fil-Belġju se jinfetħu parzjalment u wara xaharejn lockdown, is-swieq, mużewijiet u zoos se jitħallew joperaw mil-lum. Il-Belġju b’popolazzjoni ta’ madwar 11.5 miljun, huwa fost l-agħar pajjiżi Ewropej li ntlaqtu mill-Covid-19 iżda l-pajjiż beda jillaxka l-miżuri mill-bidu ta’ Mejju.

S’issa l-pajjiż irrapporta 54,989 każ u 9,005 mewt mill-coronavirus.