Edukazzjoni
ARA: Qed jingħataw l-aħħar irtokki fit-tisbiħ u r-rinovar tal-iskejjel

Fix-xhur tas-sajf, meta ħafna mill-iskejjel ikunu baħħ, il-Ministeru tal-Edukazzjoni ħa l-okkażjoni jwettaq xogħlijiet ta’ manutenzjoni u tisbiħ u faċilitajiet ġodda fi kważi 100 skola tal-Gvern madwar Malta u Għawdex. Ħafna mix-xogħol hu lest, bl-ispiża totali laħħqet il-€5 miljun.

TVM żar uħud mill-iskejjel fejn kienu għaddejjin l-aħħar xogħlijiet, qabel mal-ġimgħa d-dieħla l-istudenti u l-edukaturi jibdew sena skolastika ġdida.

Fuq l-għatba ta’ sena skolastika ġdida, il-Ministeru għall-Edukazzjoni għaddej bl-aħħar irtokki ta’ tisbiħ u rinovar f’madwar 100 skola tal-Gvern f’Malta u Għawdex. Fuq wara tal-Iskola Primarja ta’ San Ġiljan, dik li qabel kienet librerija se tinbidel f’childcare centre li se jilqa’ 60 tifel u tifla, b’investiment ta’ €700,000.

“Il-popolazzjoni hawnhekk f’San Ġiljan kibret ħafna u għalhekk qed issir il-ħtieġa kull darba li jinfetħu dawn iċ-childcare centres,” Lawrence Bugeja, Assistent Direttur fil-Ministeru tal-Edukazzjoni.

Fl-Iskola Medja ta’ Ħad-Dingli sar investiment biex klassijiet inbidlu f’laboratorji li jixbhu l-postijiet tax-xogħol. Fihom, l-istudenti se jibdew jitgħallmu suġġetti vokazzjonali.

“Peress li neħħejna xi klassijiet biex jospitaw laboratorji ġodda biex inħallu l-istess numru ta’ klassijiet fl-iskola, żidna żewġ klassijiet li nbnew mill-MEDE,” qal il-Perit Joel Fenech.

Fl-Iskola Primarja ta’ Marsaxlokk sar investiment ta’ iktar minn €300,000 li fost oħrajn jinkludi t-tkabbir taż-żona fejn jilagħbu t-tfal tal-kindergarten. “Se ssir play area bis-soft flooring. Ġiet livellata għax qabel il-play area kien hemm xi diżlivell fiha. Issa ġiet livellata. Il-binja se tibda topera minn din is-sena skolastika.”

It-taqsima tas-Servizz Għożża, li joffri għajnuna lil studenti li joħorġu tqal, se timxi lejn l-Iskola Primarja ta’ Marsaxlokk, għax hemm ippjanati xogħlijiet ta’ rinovar fl-Iskola Primarja ta’ Ħal Qormi.

Fil-Liċeo tal-Ħamrun għaddejjin ġmielhom ix-xogħlijiet fuq il-bini ta’ pont li se jgħaqqad iż-żewġ blokok tal-iskola, biex fost oħrajn titjieb l-aċċessibbiltà għall-istudenti u l-għalliema.

Huwa proġett li se jiswa mas-€700,000 u qed naħsbu li se jkun lest għall-aħħar ta’ din is-sena kalendarja.

B’investiment ieħor ta’ iktar minn €400,000, l-uffċini tal-Migrants’ Learning Unit se jimxu għall-Iskola Sekondarja tal-Ħamrun. “Jistgħu jsiru wkoll xi attivitajiet għall-istudenti minn dan il-unit. Il-binja b’kollox se tospita bejn wieħed u ieħor 20 ruħ.”

Fin-Naxxar, binja ta’ 3 sulari li kienet tintuża mill-MCAST ingħatat dehra ġdida biex tibda tintuża bħala Migrants’ Hub. “Se tilqa’ lil studenti ta’ immigranti tas-sekondarja. Il-binja se topera minn din is-sena skolastika.”

Dawn ix-xogħlijiet huma parti minn investiment ta’ aktar minn €5 miljun f’xogħlijiet li saru fl-aħħar tliet xhur, bi tħejjija għas-sena skolastika li tibda l-ġimgħa d-dieħla.

Aħbarijiet Oħra
Enerġija

Fil-budget, il-Gvern ħabbar li se jagħti għotja ta 25%, sa massimu ta’ €1,000, biex jinxtraw batteriji għall-ħażna tal-enerġija rinnovabbli. Għal din l-għotja se jkunu eliġibbli l-familji li għandhom pannelli tax-xemx…

Lokali

L-Istitut Ewropew għall-Ugwaljanza tal-ġeneru kklassifika lil Malta fil-ħmistax il-post, kważi nofs triq fl-ugwaljanza bejn in-nisa u l-irġiel. L-indiċi jkejjel diversi fatturi li jiddeterminaw il-kwalità ta’ ħajja tan-nisa f’pajjiżi Ewropej, mix-xogħol,…

Sajd

Ċifri għall-2017 maħruġa mill-Uffiċċju Nazzjonali tal-Istatistika juru li l-industrija tat-tonn f’Malta ipproduċiet 13,000 tunnellata ta’ tonn, b’valur ta’ kważi €170 miljun li 90% minnu ġie esportat lejn il-Ġappun. Il-Federazzjoni Maltija…

Ambjent

Il-Gvern u l-Oppożizzjoni ppreżentaw mozzjonijiet kontrastanti dwar l-emerġenza fil-klima bil-mozzjoni tal-Gvern temenda dik tal-Oppożizzjoni li trid li jitwaqqaf kumitat parlamentari li jkollu s-setgħa jaħtar superintendent biex jiżġura li Malta tilħaq…

Aktar