Is-Saqqajja u l-pjazza ta’ San Wistin fir-Rabat dalgħodu saru qieshom l-arka ta’ Noe b’varjetà kbira ta’ annimali li ttieħdu għall-festa ta’ Sant Anton Abbati biex jiġu mbierka f’din l-eqdem ċerimonja tat-tberik tal-annimali wara purċissjoni li ħarġet mill-Knisja ta’ San Mark.

Minkejja ħalba xita li għamlet ftit ħin biss qabel bdiet il-purċissjoni bl-istatwa ta’ San Anton Abbati li tohroġ mill-Knisja ta’ Santu Wistin, numru ġmielu ta’ familji nġabru fl-inħawi tas-Saqqajja bl-annimali domestiċi: żwiemel, klieb, qtates, għasafar u anke xi pagun fost oħrajn.

It-tfal u anki l-ġenituri tagħhom dehru ferħanin biex il-gwardjan ibierkilhom l-annimali li jrabbu b’għożża. Il-pagun bir-rixx rikk u eżotiku tiegħu din is-sena ġibed l-akbar attenzjoni għax spikka fosthom l-annimali kollha.

Annimali oħra li ttieħdu f’ħoġor il-qaddis patrun tal-annimali Sant Anton Abbati kienu jinkludu fkieren, fniek, ponijiet u ħmir fost oħrajn.

Din il-festa ġibdet ukoll l-interess tat-turisti li nżertaw ir-Rabat u waqfu jammiraw waħda mit-tradizzjonijiet antiki f’pajjiżna.

Il-festa ta’ San Anton Abbati fir-Rabat hija l-eqdem festa tat-tberik tal-annimali li tmur lura għal żmien l-Ordni ta’ San Ġwann meta l-Gran Mastru kien jibgħat il-bhejjem tiegħu biex jitbierku. Il-ħajja ta’ Sant Anton hija xhieda tar-rabta li dan il-Qaddis kellu mal-annimali.

Il-Pirjol Patri David Cortis qal li “San Anton Abbati kellu l-annimali miegħu għax meta kien qed jgħix fid-deżert inġabru l-annimali miegħu. Għalina l-Agostinjani San Anton huwa importanti għax kien permezz tal-ħajja tiegħu u l-kitba fuq il-ħajja tiegħu li Santu Wistin kien ikkonverta”.

Din il-festa tiġi ċċelebrata mill-komunità Agostinjana fir-rabat bil-purċissjoni bl-istatwa antika ta’ Sant Anton mis-Saqqajja akkumpanjata mil-banda L’Isle Adam.