Kultura
ARA: Tfal u kbar jingħaqdu biex jagħtu l-ħajja lil sengħa li qed tintilef

Fil-kampanja tar-raħal pittoresk tal-Għarb, fi tmiem din il-ġimgħa qed jiġi organizzat għall-ewwel darba il-Festival Internazzjonali tat-Tajr u r-Riħ. Dan qed joffri spettaklu ta’ lwien fis-smewwiet, u opportunità biex it-tfal jitgħallmu sengħa li kulma jmur qiegħda tintilef; il-maniffattura tat-tajr.

Ir-riħ li ħakem il-gżejjer Maltin kien barka għall-ewwel edizzjoni tal-Festival Internazzjonali tat-Tajr u r-Riħ organizzat fil-kampanja qrib il-kappella ta’ San Dimitri, fl-Għarb. Is-Sibt filgħodu l-għelieqi fl-inħawi kien fihom għaxqa b’ħafna attività; tfal jitgħallmu, adulti u anzjani jtajru, u s-smewwiet b’forom u lwien differenti.

Il-festival, organizzat mill-Kunsill Lokali tal-Għarb u l-Ministeru għal Għawdex, għaqqad flimkien għadd ta’ pajjiżi u kulturi, għax fih qed jieħdu sehem mal-ħmistax-il delegazzjoni mill-erbat irjieħ tad-dinja, fosthom il-Ġermanja, il-Brażil, il-Vjetnam, il-Ġappun u l-Arġentina.

Din kienet tradizzjoni popolari ħafna f’Għawdex fost it-tfal u l-familji, iżda maż-żmien tista’ tgħid li ntilfet. Is-Sindku tal-Għarb, David Apap Agius, qal li fl-għodwa tas-Sibt kien hemm madwar 350 tifel u tifla li ngħataw taħriġ dwar kif jagħmlu t-tajra tagħhom.

Il-qofol tal-festival jintlaħaq il-Ħadd meta tiġi ċċelebrata l-festa ta’ San Dimitri b’fiera u l-ħruq ta’ ħuġġieġa tradizzjonali. It-tfal se jkollhom opportunità li jagħtu spettaklu bit-tajr li ħadmu huma stess u se jkun hemm kompetizzjoni għall-isbaħ tajr.

Aħbarijiet Oħra
Lokali

Fi tmiem laqgħa li damet għaddejja aktar minn ħames siegħat, il-Kap tal-Partit Nazzjonalista Adrian Delia qal lill-ġurnalisti barra id-Dar Ċentrali li l-laqgħa tal-grupp parlamentari kienet waħda kostruttiva u li fiha…

Kronaka

Tilef ħajtu fl-Isptar Mater Dei, il-ħaddiem żagħżugħ ta’ 23 sena mill-Mali, li l-Ħamis tal-ġimgħa l-oħra waqa’ għoli ta’ madwar 4 sulari fil-bini tal-iskola l-ġdida tal-Qawra. L-inċident seħħ meta nqasmet tavluna…

Lokali

Il-Kap tal-Partit Nazzjonalista Adrian Delia deher dieħel id-Dar Ċentrali għal-laqgħa kruċjali tal-Grupp Parlamentari Nazzjonalista. Huwa kien milqugħ minn xi partitarji Nazzjonalisti. Mistoqsi minn TVM, Adrian Delia qal li mhux se…

Aktar