Barranin
ARA: Trump jgħid li neħħa l-maskra biex ma jpaxxix lill-ġurnalisti

Il-President tal-Istati Uniti Donald Trump reġa’ spiċċa f’kontroversja b’rabta mal-miżuri ta’ prekawzjoni kontra l-Covid-19.

Waqt li kien qed iżur fabbrika tal-Ford f’Michigan, li biddlet l-operat tagħha biex tibda tipproduċi ventilators u tagħmir protettiv, il-President deher quddiem il-midja mingħajr maskra.

Il-gvernatur ta’ Michigan, Gretchen Whitmer, ħarġet ordni li kulħadd għandu jilbes maskra meta jkun f’post magħluq.

Mistoqsi mill-ġurnalisti għalfejn ma kienx liebes maskra, il-President qal li meta kien qed idur f’postijiet oħra madwar il-fabbrika kien libisha, iżda mbagħad neħħiha biex ma jpaxxix lill-ġurnalisti meta jarawh biha, u biex jagħmel id-diskors.

Huwa qal li kien ittestja negattiv għall-virus u għalhekk ma kienx ta’ periklu għal ħaddieħor.

L-Avukat Ġenerali ta’ Michigan, Dana Nessel, qalet lill-midja li l-Ford ma kellhomx jippermettu lil xi ħadd fil-binja mingħajr maskra, lanqas lill-President, għax dan jista’ jkollu konsegwenzi serji fuq il-ħaddiema.

Fi stqarrija l-kumpanija Ford qalet li kienet ħeġġet lill-President jilbes il-maskra, u li dan kien libisha waqt li kien qed jara l-karozzi sportivi.