L-avvanzi tat-teknoloġija jgħinuna ħafna fil-ħidma tagħna ta’ kuljum. Madankollu, f’xi waqtiet iqumu d-dubji jekk dak li nkunu qed naraw hux veru jew inkella qarrieqi. Il-fotografu Daniel Cilia jkollu jħabbat wiċċu ma’ dan diversi drabi, b’mod partikolari meta jtella’ xi ritratt tal-Etna tidher minn Malta. Hemm min jiġi f’dubju jekk ir-ritratt hux awtentiku jew le.

Waqt il-programm TVAM, il-fotografu Daniel Cilia jispjega l-proċess biex jiġbed dawk ir-ritratti. Huwa juri li r-ritratti meħuda minnu tal-Etna minn Malta huma awtentiċi.

Sabiex jiġbed dawn ir-ritratti hemm sagrifiċċji kbar fosthom li jrid ibakkar kmieni u joħroġ fil-kesħa. Fl-intervista tiegħu, mal-preżentaturi Mario Xuereb u Amanda Spiteri Grech, huwa jispjega x’inhu l-aħjar temp sabiex jiġbed dawn ir-ritratti.

Matul il-programm TVAM, Daniel Cilia wera fost l-oħrajn sekwenza ta’ ritratti tal-Etna biex juri li r-ritratti mhumiex magħmula bil-photoshop. Prova oħra hija filmat li ħa tal-Etna minn Malta.

L-Etna minn Ħad-Dingli.

Sekwenza ta’ ritratti tal-Etna.

Ir-ritatti ta’ Cilia jiġbdu l-għajn ta’ bosta nies fosthom anke ta’ nies fi Sqallija. Huwa semma’ fost l-oħrajn kif darba, wara li kien qal minn fejn ħa r-ritratt, kien hemm astrofiżiku Taljan li kejjel kemm hi ‘l bogħod l-Etna u ħa l-coordinates u minn hemm ipprova li r-ritratt huwa awtentiku. Cilia spjega li kieku prova jqarraq bil-photoshop kien jinqabad.

Fl-aħħar nett Cilia jgħid li għandu xewqa li jiġbed lil Malta minn fuq l-Etna.

Ara l-intervista sħiħa ma’ Daniel Cilia hawn:

TVAM jixxandar mit-Tnejn sal-Ġimgħa bejn is-7am u d-9am.