Tradizzjonijiet
Ara: 5 użanzi mhux tas-soltu lejliet l-ewwel tas-sena madwar id-dinja

L-aħħar jum tas-sena reġa’ magħna. U, bħal-lejla, mal-erba’ rjiħat tad-dinja, kull pajjiż, bil-modi differenti tiegħu, jiċċelebra d-dħul ta’ sena ġdida.

Iżda, ġieli staqsejt jekk hawnx xi pajjiżi li għandhom xi tradizzjonijiet partikolari u mhux tas-soltu marbutin mal-lejla? Fost l-aktar użanzi li jispikkaw, mill-aktar superstizzjuża sal-aktar waħda makabra, 5 pajjiżi.

L-Italja

Bħala poplu, it-Taljani huma xi ftit jew wisq superstizzjużi. Bħal-lejla, speċjalment minn Ruma ‘l isfel, għadha ħajja t-tradizzjoni li mat-tokki ta’ nofs il-lejl jwaddbu platti, tazzi, u pożati ta’ kull xorta barra mit-tieqa. Donnhom ikunu qed jistennewh bi ħġarhom l-ewwel tas-sena dawk li jbigħu l-kċejjen. Użanza oħra fost it-Taljani hija li jilbsu qliezet ta’ taħt ta’ lewn ħamrani.

Spanja

Fost l-oħrajn, l-Ispanjoli, fl-aħħar tnax-il sekonda qabel ma jdoqqu nofs il-lejl, imdorrijin jaqbdu għanqud għeneb u jieklu tnax-il għenba. Jemmnu, li dan il-ġest iġibilhom il-kuntentizza u xi kemxa flus tajba fis-sena l-ġdida.

Ir-Russja

Hekk kif jeqleb nofs il-lejl, ir-Russi jiftħu l-bieb ta’ barra beraħ. Ġest, li skonthom bih jilqgħu s-sena l-ġdida, litteralment. Addijo l-kesħa xxoq l-għadam. Lejliet l-ewwel tas-sena wkoll, bosta jiġu jaqgħu u jqumu mill-kesħa, u jaqbżu qabża f’waħda mix-xmajjar tagħhom, bit-tama li ma tiqfilhomx qalbhom. Mhux darba ngħixu?

Il-Perù

Iċ-ċelebrazzjonijiet hawn donnhom jaħarqu xi ftit, fil-veru sens tal-kelma. Bħal-lejla, fit-toroq, il-Perù joħorġu għadd ta’ manekkini magħmulin mill-kartapesta. U, kif jeqleb nofs il-lejl, jaħarquhom. Liema użanza, issir fl-Ekwador ukoll.

Iċ-Ċili

Jekk kont mingħalik li l-użanza tal-manekkini fil-Perù kienet l-aktar waħda makabra, mela għarralek. Fiċ-Ċili, bosta, lejliet l-ewwel tas-sena jqattgħuh fi ħdan iċ-ċimiterji, biex jiċċelebraw is-sena l-ġdida mal-għeżież mejtin tagħhom. U, la semmejna l-ħwejjeġ ta’ taħt ħomor fl-Italja, iċ-Ċili donnhom lejliet l-ewwel tas-sena jilbsuhom sofor.

Aħbarijiet Oħra

Fil-Jum Dinji tat-Tindif, l-attivitajiet f’Malta kienu ffukati biex iwasslu messaġġ dwar il-ħsara li jagħmel il-plastik fil-baħar. Minn attivitajiet ta’ tindif f’erba’ bajjiet popolari, f’għodwa waħda nġabru ‘l fuq minn 150…

Illum fis-18:15 fuq TVM ser ikunu qiegħed jintwera programm bil-kanzunetti li għaddew għall-finali tal-Malta Junior Eurovision Song Contest 2020.  F’dan il-programm ser naraw 12-il kanzunetta li ġew interpretati live quddiem…

Minn għada TikTok u WeChat mhux se jkunu jistgħu jitniżżlu mill-app stores fl-Istati Uniti, sakemm il-President Donald Trump ma jilħaqx ftehim fl-aħħar ħin. L-amministrazzjoni ta’ Trump temmen li dawn l-apps…

Wara li s-sena l-oħra, Duncan Laurence rebaħ il-Eurovision l-Olanda kienet ħerqana sabiex tospita u torganizza l-Eurovision 2020. Madankollu, minħabba l-COVID-19 il-pjanijiet ma marrux kif wieħed xtaq u stenna. Il-pandemija waslet…

Aktar