Kronaka
AĠĠORNAT: “Grazzja kbira li m’inix trab bħal dak il-ġebel” – resident

Tard illejla, għall-ħabta tal-10.40pm, iġġarrfu 3 appartamenti li hemm biswit sit ta’ kostruzzjoni fit-Telgħa ta’ Gwardamangia.  TVM huwa infurmat li ħadd ma weġġa’ minkejja li l-appartamenti kienu joqogħdu fihom in-nies.

Malli ġġarraf il-bini, qamet kommossjoni sħiħa fl-inħawi hekk kif instema’ ħoss kbir ta’ ġebel jaqa’ li ħasad lill-ġirien.  Sar head count biex jiġi stabbilit jekk ir-residenti laħqux ħargu kollha mill-bini qawwijin u sħaħ.

Iż-żona ġiet evakwata minħabba l-periklu li hemm, tant li mal-ħin bdew jaqgħu xi knatan mill-appartamenti.  Fuq il-post il-Pulizija tad-Distrett tal-Ħamrun fosthom is-Supretendent Joe Hersey u l-Ispettur Robert Vella, kif ukoll il-Pulizija mit-Taqsima tal-RIU.

Mal-ħin żdied ukoll in-numru ta’ ħaddiema mid-Dipartiment tal-Protezzjoni Ċivili biex jiċċekkjaw il-binijiet humiex ukoll fil-periklu li jaqgħu.  Dan minbarra li ħareġ fid-deher li l-appartamenti li ġġarrfu fihom numru ta’ konsenturi fil-ħitan.

Ħaddiema tal-Enemalta marru wkoll fuq il-post biex jiċċekkjaw jekk hemmx periklu fl-inħawi għar-residenti li joqogħdu fil-qrib tal-bini li ġġarraf minħabba xi wires tal-elettriku li setgħu ntlaqtu minn dan l-inċident.

TVM huwa infurmat li fil-partijiet tal-appartamenti li ġġarrfu ma kien hemm ħadd. L-appartamenti kienu abitati iżda nies ma nzertawx fil-partijiet li waqgħu.

Kif semgħu iċ-ċaqlieq ħarbu lejn taraġ u ħarġu mill-bieb tal-blokka.  Resident qal lil TVM “grazzja kbira li m’inix trab bħal dak il-ġebel”.

Il-kawża tat-tiġrif għadha lanqas mhi magħrufa.  Iktar investigazzjonijiet mill-Pulizija għadhom għaddejjin.

 

Aħbarijiet Oħra
Storja

Magna ta’ ajruplan tal-gwerra, li possibilment iġġarraf fit-Tieni Gwerra Dinija, kienet irkurprata minn qiegħ il-baħar fil-bokka tal-Port il-Kbir wara ħidma konġunta bejn l-Università ta’ Malta, Heritage Malta u l-Forzi Armati….

Teknoloġija

Wara l-ajruplani, issa anke l-vetturi bdew jiġu jiġu mgħammra b’kaxxa sewda, li normalment tkun f’nofs il-vettura. Għalkemm s’issa din mhijiex obbligatorja, aktar manifatturi tal-karozzi qed jinkluduha. Fost aktar miżuri biex…

Infrastruttura

Waħda mill-kawżi ewlenin ta’ ħruġ ta’ drenaġġ fit-triq u fil-baħar ġejja minn katusi tal-ilma tax-xita li qed jitqabbdu direttament mas-sistema tad-drenaġġ. Jirriżulta li ħafna ma jafux li dan hu l-każ…

NGOs

Seba’ għaqdiet mhux governattivi Maltin se jwettqu tmien proġetti fl-Afrika bl-għajnuna ta’ madwar nofs miljun ewro mill-programm tal-għajnuna għall-iżvilupp tal-Ministeru tal-Affarijiet Barranin. Il-proġetti jvarjaw minn skola ġdida għall-bniet f’żona rurali…

Aktar