Annimali
Bini abbandunat se jsir ċentru ta’ rijabilitazzjoni għall-annimali selvaġġi

B’investiment ta’ €2 miljun, bini abbandunat fi Xrobb l-Għaġin mistenni jinbidel f’ċentru ta’ rijabilitazzjoni u edukazzjoni relatat mal-annimali fis-selvaġġ.

Il-proġett immexxi minn Nature trust Malta mistenni jinkludi aktar minn 20 tank tal-ilma waqt li jżid attrazzjoni turistika differenti fin-Nofsinhar ta’ Malta.

Il-proġett se jsir fi żmien sentejn u jinvolvi l-bini abbandunat fejn kien hemm l-istazzjon tad-Deusche Welle.

Vince Attard, il-President ta’ Nature Trust Malta li tamministra l-Park Naturali ta’ Xrobb l-Għaġin qal li l-proġett ilu jberren f’moħħu 20 sena u issa se jsir bl-għajnuna ta’ żewġ miljun ewro mill-fondi reġjonali tal-Unjoni Ewropea. Żied li ċ-ċentru se jkun maqsum f’żewġ partijiet – fejn jilqgħu annimali feruti li jgħixu fis-selvaġġ u naħa oħra se tkun ċentru edukattiv għall-pubbliku.

“23 tank tal-fkieren u pool kbir ta’ 9 metri għall-annimali aktar kbar li ġieli niltaqgħu magħhom. Partijiet fejn milqugħ il-qniefed u oħrajn bħal vivarjum għar-rettili li jġibu n-nies. In-naħa l-oħra barra ċentru għan-nies ħa jkun hemm laboratorju fejn jistgħu jagħmlu esperimenti u jitgħallmu fuq il-bijodiversità tagħna.

Is-Sur Attard qal li din is-sena Nature Trust Malta pprovdiet kura lil 400 qanfud u 50 farfett il-lejl fost oħrajn. “Ikollna ħafna fkieren li jidħlu wara li jkunu belgħu snanar jew plastik. Friefet il-lejl li jaqgħu jew jaħbtu ma’ xi arblu, qniefed li jew jittajru jew jaħtfuhom klieb. Ikollna wkoll oħrajn li jinqabdu fi skart, bħal sriep li jidħlu biex jieklu ġurdien f’bott tal-birra u jeħel fiha.”

Il-President ta’ Nature Trust qal li ċ-ċentru se jkun mgħammar ukoll biex jgħin lill-annimali f’każi ta’ tniġġis miż-żejt fl-ibħra. Żied li parti mill-proġett se jinkludi wkoll ir-restawr tal-ħitan li jdawru ż-żona.

Il-Ministru għall-Ambjent, Jose Herrera, qal li fix-xhur li ġejjin se jkun qed juża l-poter li għandu biex jagħti artijiet tal-gvern lill-fondazzjonijiet, biex imantnuhom taħt is-sorveljanza tal-Awtorità għall-Ambjent. Dr Herrera qal li ġie avviċinat minn sitt kumpaniji li waqqfu fondazzjoni bħala parti mill-impenn soċjali tagħhom biex jingħataw art, fosthom siti ta’ natura elfejn biex jieħdu ħsieb imantnuhom. Qal li b’hekk jitnaqqas piż finanzjarju minn fuq il-Gvern waqt li jkunu ndukrati tajjeb.

Min-naħa tiegħu, is-Segretarju Parlamentari għall Fondi Ewropej Aaron Farrugia stieden lil Nature Trust tippreżenta pjan b’saħħtu biex jinkisbu fondi Ewropej għall-proġett li jgħinu lil Malta tgħaddi għall-bidla ekoloġika li hemm bżonn.

Aħbarijiet Oħra
Kronaka

Raġel jinsab bi ġrieħi gravi wara argument fiż-Żebbuġ, Għawdex. L-inċident seħħ ilbieraħ għall-ħabta ta’ 23:50hrs fi Triq il-Port, fiż-Żebbuġ. L-argument seħħ bejn żewġ persuni; raġel barrani ta’ 39 sena residenti Ħaż…

Immigrazzjoni

Il-Forzi Armati ta’ Malta salvaw 47 immigrant li sabu ruħhom f’diffikultà. Fi stqarrija ntqal li l-operazzjoni ta’ salvtaġġ seħħet ilbieraħ filgħodu bl-immigranti ddaħħlu Malta abbord lanċa tal-Forzi Armati, f’Xatt it-Tiben…

Lokali

Aktar ma jmur aktar il-finali ta’ ‘X Factor Malta’ qed toqrob. U, b’xorti ħażina għall-kontestanti li għad fadal, il-postijiet għal-Live Show tal-aħħar tgħoddhom fuq subgħajk. B’hekk, minn ġimgħa għal ġimgħa,…

Aktar