Nar żgħir fit-terminal tal-arrivals fl-Ajruport Internazzjonali ta’ Malta wassal għall-evakwazzjoni tan-nies.

Stqarrija maħruġa mill-MIA qalet li t-taqsima tat-tifi tan-nar tal-ajruport marret fuq il-post immedjatament. Jassistu fl-evakwazzjoni fuq il-post hemm ukoll il-Protezzjoni Ċivili.

TVM nfurmat li persuna waħda kellha bżonn xi assistenza medika tad-duħħan li belgħet, madanakollu ħadd aktar ma’ weġġa’ fl-inċident. L-MIA qed jitlob lil min għandu xi titjira jiċċekkja s-sit elettroniku www.maltairport.com

TVM huwa nfurmat li għall-ħabta tas-2.15pm ħa n-nar u bdiet l-operazzjoni tat-tifi tan-nar. In-nar ġie kkontrollat u l-Ajruport qed jaħdem biex jirritorna kollox għan-normal.

Il-Ministru għall-Intern u s-Sigurtà Nazzjonali Michael Farrugia qal li seħħ ħruq fil-pump room tal-akkwarju li jinsab bejn iż-żona Shengen u non-Shengen.

Hemm diversi titjiriet li jidhru li ġew milquta minn din is-sitwazzjoni fosthom dawk li kellhom jitilqu minn Malta lejn Stokkolma, Larnakas/Dubaj u Gatwick se jittardjaw biex jitilqu. It-titjira ta’ Gatwick ġiet iddevjata mentri titjira oħra minn Krakovja se tittardja wkoll.

Il-pubbliku qed jiġi mitlub biex kemm jista’ jkun jevita ż-żona tal-MIA.