L-attriċi Brigitte Nielson irrakkuntat kif wara li ppruvat kemm-il darba ssir omm bl-IVF, irnexxielha ssir omm ta’ 54 sena u welldet lit-tifla Frida s-sajf li għadda.  Frida hija l-5 wild ta’ Nielson u meta jikkritikawha għax saret omm kbira, l-attriċi twieġeb li la hawn irġiel li jsiru missirijiet ta’ età kbira, hi tista’ tagħmel l-istess ħaġa.

Nielson qalet f’intervista f’The Guardian li ma qatgħatx qalbha u baqgħet tipprova sakemm kien fadal l-aħħar embrijun.  Stqarret li kienet esperjenza diffiċli u li ġiet tiswieha ħafna flus, speċjalment fl-età tagħha.  L-attriċi Daniża spjegat kif l-ormoni kienu qed jirreaġixxu b’mod differenti minn ta’ nisa oħrajn u kull meta kienet tirċievi telefonata li l-konċepiment kien falla kienet tħossha mkissra.

Fl-intervista, Nielson żvelat li baqgħet tittama li xi darba se jirnexxielha tant li meta waslet għall-aħħar embrijun it-tobba kienu qalulha li għandha ċans biss 2.5% li jirnexxielha.  Ingħatat parir biex ma tgħid xejn lil ħadd sakemm jgħaddu 27 ġimgħa minħabba li kienet f’riskju kbira li l-proċeudra tal-IVF ma taħdimx fuqha.

L-attriċi, li kienet saret famuża għar-relazzjoni li kellha mal-attur Amerikan Sylvester Stallone, għandha 4 itfal subien minn tliet irġiel differenti.  Iżda qatt ma setgħet issir omm mir-raġel tagħha l-produttur Taljan Mattia Dessi li ilhom miżżewġin 13-il sena.  Qalet li tirċievi bosta ittri mingħand nisa li jgħidulha li l-istorja tagħha qed jagħlu iktar kuraġġ biex isiru ommijiet bl-IVF.