Lokali
Budget 2020: żieda ta’ 20% fl-allokazzjoni finanzjarja għal Għawdex

Il-budget għas-sena d-dieħla żied il-fondi lill-Ministeru ta’ Għawdex bi €11-il miljun. Il-Ministru Justyne Caruana indikat uħud mill-proġetti li se jitwettqu b’fondi mill-budget tal-gvern. F’konferenza tal-aħbarijiet fil-foss taċ-Ċittadella, Dr Caruana qalet li l-miżuri għal Għawdex huma msejsa fuq il-ħolqien tax-xogħol, it-titjib tal-infrastruttura u l-konnettività.

Il-Ministru għal Għawdex Justyne Caruana qalet li l-budget għas-sena d-dieħla hu dikjarazzjoni b’saħħitha favur Għawdex billi l-fondi lill-Ministeru se jiżdiedu b’20%.

“Li tfisser 11-il miljun iktar li matul l-2020 ħa ninvestu f’inizjattivi u fi proġetti f’Għawdex għall-Għawdxin. Qed naraw kif il-miżuri tal-budget jistgħu essenzjalment jinqasmu fi tliet pilastri li huma ffukkati fuq il-ħolqien tax-xogħol, l-infrastruttura u l-konnettività,” qalet il-Ministru Justyne Caruana.

Il-Ministru Caruana qalet li hemm vot ta’ €10 miljun għat-toroq f’Għawdex meta sa ftit tas-snin ilu Għawdex kien jieħu biss miljun għal dan il-għan. Fost l-oħrajn semmiet li se jsiru xogħlijiet fi Triq l-Imġarr, li min-Nadur twassal sal-Port tal-Imġarr, u t-triq b’tul ta’ erba’ kilometri li mir-Rabat twassal sa Marsalforn.

Qalet li ftit tal-ġimgħat oħra se jinfetħu r-Research and Innovation Hub fix-Xewkija u l-iskola Medika ta’ Barts. Dr Caruana qalet li se jsir investiment biex il-vetturi tal-Gvern jinbidlu għal elettriċi bil-għan li Għawdex tkun destinazzjoni ambejntali.

Dwar il-konnettività, Dr Caruana qalet li l-proġett tal-mina għaddej skont il-pjan stabbilit fl-istess waqt li se jsir investiment biex tiżdied l-effiċjenza tal-Gozo Channel permezz tar-raba’ vapur u s-sistema elettronika tal-biljetti. Żiedet li għaddej ix-xogħol biex jiġi introdott is-servizz tal-fast ferry. Dr Caruana qalet li l-konnettività bejn iż-żewġ gżira se tkompli titjieb bl-istallazzjoni tat-tieni fibre optic.

Qalet li skont l-Uffiċċju tal-Istatistika, din is-sena Għawdex kellu l-inqas rata ta’ qgħad. Semmiet li l-Gvern qed jalloka miljun u tliet mitt elf ewro għal impjiegi ġodda u ta’ kwalità u miljun ieħor biex kumpaniji Maltin u barranin jiftħu f’Għawdex.

Spjegat li qed jiġu esplorati niċeċ ġodda u għalhekk inħoloq fond biex Għawdex isir destinazzjoni għall-konferenzi, il-laqgħat u attivitajiet.

Aħbarijiet Oħra
Ambjent

Il-Gvern qed ifassal abbozz ta’ liġi biex Malta jkollha Qorti tal-Ambjent fejn jinstemgħu u jiġu deċiżi każi ta’ reati ambjentali. Il-Ministru tal-Ambjent qal li għandu l-kelma tal-avukati li l-abbozz ta’…

Edukazzjoni

Fil-bidu tas-sena d-dieħla, studenti mill-Korea t’Isfel se jibdew jitħarrġu f’Malta biex jiggradwaw bħala tekniċi fil-manutenzjoni tal-ajruplani. L-istudenti se jitħarrġu fl-MCAST wara qbil bejn il-kulleġġ, żewġ kumpaniji privati u l-gvern tal-Korea…

Edukazzjoni

Il-Fondazzjoni LifeCycle għamlet għotja ta’ €25,000 lill-Università għar-riċerka dwar ċesti li jitrabbew fil-kliewi. Riċerkaturi ser jagħmlu stħarriġ dwar il-ġenetika ta’ din il-kundizzjoni li tintiret fil-familji u twassal għal mard serju…

Televiżjoni u Radju

Il-prevedibbli se jsir imprevedibbli waqt l-għodwiet min-nhar it-Tnejn li ġej ma’ Carlo, Gordon u Anna fuq Magic Malta 91.7 FM. It-tliet karattri vivaċi b’livelli varji ta’ esperjenza radjofonika se jieħdu…

Aktar