MEUSAC
Charlie u sħabu qed jaħdmu mad-Dwana b’fondi Ewropej

X’għandhom komuni d-Down Syndrome Association Malta, il-Kunsilli Lokali tas-Siġġiewi, l-Għasri, u Ta’ Sannat, u d-Dipartiment tad-Dwana?

Dawn l-entitajiet, fost ħafna oħrajn, ħadu fondi tal-UE għal proġetti ta’ ġid għall-komunità. Dan għamluh għaliex il-MEUSAC għenithom ifasslu applikazzjoni tajba li minnha setgħu jieħdu l-fondi Ewropej.

Xi proġetti wettqu jew qed iwettqu dawn l-organizzazzjonijiet u entitajiet?

– Id-Down Syndrome Association Malta kisbet fondi biex setgħet torganizza skambji ta’ numru ta’ żgħażagħ bid-down synrome. Waqt dawn l-attivitajiet, il-parteċipanti ltaqgħu ma’ żgħażagħ oħra li magħhom qasmu l-esperjenzi tagħhom u tgħallmu affarijiet ġodda mingħand xulxin.

– Il-Kunsilli Lokali ta’ diversi lokalitajiet Maltin u Għawdxin, fosthom dawk tas-Siġġiewi, l-Għasri u tas-Sannat, akkwistaw fondi biex jirranġaw numru ta’ toroq rurali. Dawn il-proġetti qed jagħmluha aktar faċli għall-bdiewa biex jidħlu fl-għelieqi tagħhom.

– Id-Dipartiment tad-Dwana, xtara klieb biex jgħinu lid-Dipartiment jaqbad sigaretti u tabakk b’kuntrabandu. L-istess Dipartiment se jixtri vann mgħammar b’tagħmir tal-X-ray li jippermetti lill-uffiċjali tad-Dwana f’Malta jispezzjonaw iktar fid-dettall merkanzija li tidħol f’Malta mis-suq intern tal-Unjoni Ewropea.

Bħala aġenzija tal-Gvern, il-MEUSAC tipprovdi assistenza bla ħlas lill-għaqdiet mhux governattivi, Kunsilli Lokali, skejjel, entitajiet tal-Gvern u oħrajn, biex ifasslu l-proġetti tagħhom u jissottomettu l-applikazzjoni neċessarja għall-fondi Ewropej.

Mal-€50 miljun f’fondi tal-UE għal għaqdiet u entitajiet

Mill-2008 sal-lum, il-MEUSAC assistiet 419 entità differenti sabiex jibbenefikaw minn ftit iktar minn €49 miljun f’fondi Ewropej għall-proġetti tagħhom.

Riċentement, il-MEUSAC beda joffri wkoll taħriġ lill-entitajiet diversi, f’dak li għandu x’jaqsam mal-ippjanar ta’ proġett kompetittiv u l-proċess involut għas-sottomissjoni tal-applikazzjoni għall-fondi.

Jekk l-organizzazzjoni tiegħek tixtieq tkun taf kif tista’ tibbenefika minn fondi tal-UE ibgħat email lil [email protected] jew ċempel 2200 3300.

 

Tagħrif miġbur minn:

Aħbarijiet Oħra
Sport

Fit-tielet logħba tagħhom fil-Kampjonat tal-Amateurs, it-tim ta’ Syria Gżira FC kiseb l-ewwel rebħa bl-iskor ta’ 3-1 kontra Fleur De Lys FC. Il-player Lucky Chizobor skurja żewġ gowls filwaqt li Julius…

Saħħa

Ilbieraħ filgħaxija għadd ta’ nies nġabru quddiem iċ-Ċentru Esplora fil-Kalkara għal mixja simbolika bħala parti mix-xahar iddedikat għall-għarfien dwar il-kanċer tas-sider, magħruf bħala Pink October. Din is-sena n-nisa u l-irġiel…

Brexit

Wara dibattitu f’sessjoni straordinarja fil-House of Commons, il-membri parlamentari ivvutaw favur mozzjoni li tobbliga lill-Prim Ministru biex jitlob estensjoni mill-Unjoni Ewropea għal Brexit. Dan sakemm il-ftehim għall-ħruġ mill-Unjoni Ewropea jiġi…

Lokali

L-invażjoni Torka fit-Tramuntana tas-Sirja ġiet ikkundannata mill-komunità Kurda f’Malta li bl-appoġġ tal-Moviment Graffitti organizzaw manifestazzjoni paċifika quddiem l-Ambaxxata Torka fil-Floriana. Huma kkundannaw dak li sejħu bħala assalt brutali u mingħajr…

Aktar