Lokali
Dirgħajn Schembri jżommu t-tifel li twieled bl-għajnuna tiegħu, illum imfarfar

Il-familja tal-kuntistabbli Simon Schembri tinsab sorpriża bil-progress mgħaġġel li għamel fl-aħħar sigħat anke jekk kelliem għall-familja qal li minħabba n-natura gravi tal-feriti li sofra, it-triq biex jirkupra hija twila ħafna.

Il-familja raddet ħajr lil kull min qed joffri appoġġ iżda appellat għall-ħarsien tal-privatezza u ma tridx li għalissa jkomplu jinġabru flus.

Ix-xahar id-dieħel Julian Cassar se jagħlaq ħames snin. Twieled fid-Dipartiment tal-Emerġenza tal-Isptar Mater Dei ħames minuti biss wara li ommu Alexia waslet l-isptar bis-saħħa tal-iskorta ta’ tliet pulizija tat-traffiku wara li l-karozza misjuqa minn żewġha Jesmond inqabdet fit-traffiku.

Fost it-tliet Pulizija li servew ta’ anġli kustodji f’din il-ġrajja ħames snin ilu, kien hemm Simon Schembri li ngħata privileġġ iħaddan it-tarbija tal-koppja Cassar li qatt ma tinsa l-opra tiegħu.

L-inċident tat-Tlieta li għadda f’Ħal Luqa kien ukoll bħal stallett għall-familja Cassar, iżda iktar u iktar għall-familja ta’ Schembri nnifsu, li saħansitra sejħet biex tkun rispettata l-privatezza tagħha. Sadanittant, il-ħabib tiegħu u tal-familja Schembri, l-Ispettur Herman Mula, qal li l-kundizzjoni ta’ Schembri kompliet ġejja għall-aħjar.

“Il-bieraħ fetaħ għajnejh, qal l-ewwel kliem, illum iċċajtajna naqra flimkien ukoll, jiġifieri anke bħala burdata hija xi ħaġa pożittiva ħafna, biss però l-qagħda tiegħu hija kritika u l-ġrieħi huma serjissimi, però l-progress qiegħed hemm u dik hija xi ħaġa li tagħmel ħafna kuraġġ,” qal l-Ispettur Mula.

Fi stqarrija, il-Pulizija qalet li l-investigazzjoni dwar dal-każ hija sensittiva u t-tixrid ta’ informazzjoni, fosthom filmati u ritratti tal-inċident, jaf ikunu ta’ ħsara għall-familja.

F’kummenti lil TVM, l-Ispettur Mula qal li l-familja tal-kuntistabbli tixtieq tirringrazzja lill-investigaturi u lill-pubbliku tal-appoġġ inkredibbli, fosthom lil dawk li ħadu inizjattiva jiġbru fondi.

“Il-familjari jixtiequ li l-ewwel jagħmlu assessment tal-affarijiet u l-ispejjeż li se jkollhom bżonn, u jekk ikunu jistgħu ilaħħqu magħhom, ġabriet għandhom isiru għal min vera jkollu bżonn,” qal l-Ispettur Mula.

Fi stqarrija konġunta, il-Police Officers Union, il-Malta Police Association u l-Assoċjazzjoni tal-Pulizija rtirati ħabbru li s-Sibt li ġej filgħodu se jorganizzaw mixja ta’ solidarjetà miftuħa għall-kulħadd minn Pjazza San Ġorġ sa quddiem il-Parlament. Il-mixja se ssir b’solidarjetà mal-membri tal-Korp li b’sogru għalihom u għall-familji tagħhom jgħaddu minn tbatija kbira.

Aħbarijiet Oħra
Knisja Maltija

Riċerka ppubblikata fl-aħħar jiem tixħet dawl dwar l-ewwel attentati għas-separazzjoni tal-poteri bejn Stat u Knisja f’Malta. Kien Nicolo’ Muscat – figura prominenti fl-amministrazzjoni tal-Ordni tal-Kavallieri – li f’nofs is-seklu 18…

Lokali

Ġimgħa wara d-delitt ta’ omm żagħżugħa f’Raħal Ġdid li allegatament inqatlet mis-sieħeb tagħha, bosta għaqdiet speċjalment tan-nisa komplew jitkellmu b’diversi stqarrijiet dwar dan il-femiċidju u l-problema tal-vjolenza domestika. Mill-banda l-oħra…

Annimali

L-Assoċjazzjoni Exotic Finch Malta qed tagħti opportunità oħra lill-pubblika japprezza l-ġmiel ta’ 500 għasfur li minkejja li l-oriġini tagħhom hija barranija tfaqqsu f’Malta wara ħafna studju u esperementazzjoni. Il-wirja li…

Lokali

Il-Malta National Electromobility Platform fi ħdan Transport Malta qed tikkordina diversi inizjattivi u attivitajiet marbuta mal-Ġimgħa Ewropea Tal-Mobbiltà. It-tema għal din is-sena hija “Multimodality – Mix and Move”. Din it-tema…

Aktar