Fil-Palazz ta’ San Anton Justyne Caruana, Clayton Bartolo, Miriam Dalli u Clyde Caruana nħatru uffiċjalment bħala Ministri mill-President George Vella. Fl-ewwel kummenti tagħhom ma’ Television Malta il-Ministri l-ġodda elenkaw il-prijoritajiet tagħhom.
Erba’ deputati tal-Gvern illum waranofsinhar ħadu l-ġurament u nħatru Ministri fil-Kabinett. Fil-Palazz ta’ Sant’Anton Justyne Caruana, Clayton Bartolo, Miriam Dalli u Clyde Caruana ħalfu l-lealtà tagħhom lejn il-kostituzzjoni hekk kif assumew responsabbiltajiet ġodda bħala Ministri.
F’kummenti ma’ Television Malta, il-Ministru tal-Edukazzjoni Justyne Caruana wiegħdet li se tkun qed taħdem biex issaħħaħ is-settur edukattiv.
“Prinċipju li se nkun qed inmexxi bih huwa li jien ġenitur bi tfal li jattendu l-iskejjel. Allura naf bl-isfidi li jiffaċċjaw l-edukaturi l-familji u se nkun qed naħdem magħhom biex nidentifikaw l-isfidi u naħdmu flimkien.”
Prijorità ewlenija għall-Ministru għat-Turiżmu u l-Protezzjoni tal-Konsumatur Clayton Bartolo hija li jdawwar dan iż-żmien ta’ sfida f’wieħed ta’ opportunità.
“Irridu nagħtu kuraġġ lis-settur u lil dawk kollu involuti f’dak il-qasam importanti rridu nsibubilanċ bejn is-saħħa u bejn dak kollu li jgħin biex dan is-settur tant importanti jirpilja.”
Wara sitt snin fil-parlament Ewropew l-avukat Miriam Dalli ġiet fdata bil-Ministeru għall-Enerġija, l-Intrapriża u l-Iżvilupp Sostenibbli. Qalet ma’ TVM li dan id-dekastru huwa turija ċara tad-direzzjoni li l-Gvern irid jieħu fir-rigward tas-sostenbiiltà.
“L-għan aħħari jkun dekarbinżaw l-ekonomija u setturi importanti biex nilħqu dan huwa l-enerġija u l-intrarpirża peress tal-politika tagħna tinkorpora sustanabile development goals hija viżjoni tiegħi.”
U għall-Clyde Caruana li minn Kap tas-Segretarjat fl-Uffiċċju tal-Prim Ministru nħatar Ministru għall-Finanzi u x-Xogħol il-prijoritajiet huma tnejn li f-finanzi tal-Gvern jibqgħu sodi u li s-suq tax-xogħol jibqa’ stabbli.
“Il-finanzi tal-Gvern jibqgħu b’saħħithom però f’dak li għandu x’jaqsam ta’ xogħol irridu naraw li l-familji Maltin u Għawdxin iżommu x-xogħol tagħhom u għaldaqstant se nara kif se nżewaq l-għajnuna finanzjarja biex is-suq tax-xogħol Malti jibqa b’saħħtu.”
Iċ-ċerimonja tal-ħatra saret mill-President George Vella, fil-preżenza tal-Prim Ministru Robert Abela, u numru limitat ta’ qraba u membri distinti oħra biex jiġu rispettati r-restrizzjonijiet tal-imxija tal-Covid.
