Divertiment
Estiż il-Karnival tas-sajf – opportunitajiet biex titgħallem l-arti tal-karnival

Festivals Malta flimkien mal-Kunsill Lokali ta’ Marsaskala, il-Ministeru għall-Ġustizzja u l-Gvern Lokali u l-Aġenzija  Nazzjonali tal-Litteriżmu se testendi l-Karnival tas-sajf bl-organizzazzjoni ta’ ‘Hands-On Summer Carnival Experience’.

Fi stqarrija, Festivals Malta qalet li din l-attività ħajja hi intiża biex il-pubbliku ġenerali, speċjalment it-tfal, jiskopru aktar kif isir ix-xogħol artistiku marbut mal-karnival. Din l-esperjenza se ssir fix-Xatt ta’ Wied il-Għajn nhar il-Ħadd 12 u t-Tnejn 13 ta’ Awwissu mis-7:30pm ’il quddiem.

Għall-okkażjoni se jkun hemm numru ta’ stands fejn jiġi spjegat kif tinħadem il-kartapesta, l-imuddellar bit-tafal, it-tpinġijiet tal-maskri u l-forom bil-bżieżaq waqt diversi attivitajiet speċjalment dawk intiżi għat-tfal. Il-pubbliku se jkun imħeġġeġ jipparteċipa u wara kull spjega jipproduċi biċċa xogħol hu stess marbuta mal-karnival.

Barra minn hekk, permezz tal-Aġenzija Nazzjonali tal-Litteriżmu, se jittellgħu rakkonti ta’ stejjer fil-kafetterija Jacob’s Brew. Dawn l-istejjer, li jkunu animati u mżewqa b’diversi forom espressivi, se jsiru l-Ħadd 12 ta’ Awwissu għal tfal bejn l-4 u 7 snin u l-għada t-Tnejn 13 ta’ Awwissu għal tfal sa 3 snin. Peress li l-post hu ristrett hu rakkomandat li tirriserva post minn qabel billi ċċempel fuq 25982990 jew tibgħat email fuq [email protected].

Festivals Malta tfakkar li l-isfilati tal-Karnival tas-sajf se jsiru l-Ġimgħa u s-Sibt 17 u 18 ta’ Awwissu f’Buġibba u l-Ħadd 19 ta’ Awwissu f’Wied il-Għajn. Din is-sena flimkien mal-Ministeru għall-Għawdex se jittella’ wkoll fl-Imġarr, Għawdex nhar is-Sibt 1 ta’ Settembru, 2018.

Aħbarijiet Oħra
Temp

L-uffiċċju meterjoloġiku qed ibassar riħ qawwi. Ir-riħ mix-Xlokk Lvant ser ikun qawwi għal qawwi ħafna fuq l-inħawi fejn jaqbel tal-Gżejjer Maltin. Din it-twissija tibqa’ fis-seħħ sad-disgħa ta’ għada filgħodu u…

Saħħa

Mistenni jibda x-xahar id-dieħel ix-xogħol ta’ twaqqiegħ u tħammil għat-tieni dar residenzjali għal persuni bil-marda newroloġika tal-ALS. Il-proġett, f’Ħaż-Żebbuġ, mistenni jiswa sitt miljun Ewro. Ma’ TVM, il-fundatur tal-Fondazzjoni ALS Malta,…

Stejjer Umani

L-imħabba hi minsuġa fil-karattru ta’ William Saliba. L-altruwiżmu tiegħu jispikka ma’ pazjenti b’mard fil-kliewi. Għamel l-isfida tal-Lifecyle tnax-il darba…iżda fuq kollox kien bħas-Samaritan it-Tajjeb, b’ġest ma’ raġel ieħor meta tah…

Aktar